पोखरा, पोखरामा सम्पन्न तायमचा नृत्य प्रतियोयगितामा पुरुषतर्फ तेर्सापट्टी तायमचा समिति पोखरा–३ ले प्रथम स्थान हासिल गरेको छ । गाईजात्रा अवसरमा रानीपौवा तायमचा नाच समितिले आयोजना गरेको प्रतियोगितामा २० टिमलाई पछि पार्दै तेर्सापट्टीले नगद ३ लाखसहित ट्रफी र प्रमाणपत्र पुरस्कार हात पारेको हो ।

प्रतियोगितामा नयाँबजार सांस्कृतिक समिति द्वितीय र भीमसेन टोल सुधार समिति तृतीय भए । उनीहरुले क्रमशः २ लाख र १ लाख रुपैयाँ पुरस्कार प्राप्त गरे । मोहरिया सिंहनाथ टोल तायमचा समिति सान्त्वना हुँदै ३० हजार नगद पुरस्कार हात पारेको छ ।

महिलातर्फ बागबजार बगर तायमचा समिति, पोखरा–१ प्रथम तथा लामाचौर नेवा खल गुठी र भण्डारढिक नेवा खल क्रमशः दोस्रो र तेस्रो भएको नेवाः खल कास्कीले जानकारी दिएको छ ।

महिलातर्फ प्रथम, दोस्रो र तेस्रोलाई क्रमशः ४०, २० र १० हजार रुपैयाँ पुरस्कार दिइएको नेवा: खल कास्कीका अध्यक्ष अशोक पालिखेले जानकारी दिए । उनीहरुलाई पोखरा महानगरपालिकाका मेयर धनराज आचार्य लगायतले पुरस्कार प्रदान गरे । शनिबार बिहानदेखि सुरु भएको प्रतियोगिता राति अबेर सम्पन्न भएको हो । प्रतियोगितामा पुरुषतर्फ २१ र महिलातर्फ ९ टिमले सहभागिता जनाएका थिए ।

यस वर्षदेखि पोखरा तेर्सापट्टी निवासी तीन दाजुभाइ रामकाजी, रवीन्द्र र शंकर श्रेष्ठले आफ्नाबाबु हेमकुमार र बालकुमारीको स्मृतिमा पुरस्कारका लागि १० लाख रुपैयाँ प्रदान गरेका थिए ।