पोखरा, काठमाडौंबाट पोखरा जाँदै गरेको बस त्रिशूली नदीमा खस्दा ८ जनाको निधन भएको छ ।

धादिङको गजुरी २, चालीसे झरना नजिकै यो दुर्घटना भएको हो । वसमा सवार भएका मध्ये ८ वटा शव भेटिएको जिल्ला प्रहरी कार्यालय धादिङका प्रहरी प्रमुख गौतम मिश्रले जानकारी दिए ।

काठमाडौंबाट पोखरा जाँदै गरेको प्रदेश ३–०१–००५ ख ९९५२ नम्बरको बस पृथ्वी राजमार्गको गजुरीनजिकै त्रिशूली नदीमा खसे लगत्तै उद्धार कार्य सुरु भएको थियो । उद्धार अहिले पनि जारी रहेकाले मृतकको संख्या बढ्न सक्ने प्रहरीको आँकलन छ ।

बस करिव ४० मिटर तल नदीमा खस्दा गम्भीर घाइते भएकालाई उपचारका लागि काठमाडौं पठाइएको छ । दुर्घटनामा २ महिला र ६ पुरुष गरी ८ जनाको मृत्यु भएको जिल्ला प्रहरी कार्यालय धादिङका प्रवक्ता एवम् डिएसपी सन्तु जयसवालले जानकारी दिए । आठ जना घाइतेको उपचार भइरहेको जनाइएको छ ।