पोखरा, प्रधानमन्त्री पुष्पकमल दाहाल प्रचण्डले बूढीगण्डकी जलविद्युत आयोजनाको फिल्ड कार्यालय उद्घाटन गरेका छन् । गोरखा जिल्लाको सिरुङ्टारमो १२ सय मेगावाट क्षमताको जलविद्युत आयोजनाको कार्यालय उद्घाटन गरिएको हो ।
यो उद्घाटनले बहुचर्चित यो आयोजनाको निर्माण सुरु हुने आसा बढेको छ । गोरखा र धादिंग जिल्लाको बीचबाट बग्ने बुढीगण्डकी नदीमा ८० मिटर अग्लो ड्याम बन्ने र पावर हाउस गोरखा जिल्लामा रहने योजना रहेको छ । उक्त ड्याम ६३ किलोमिटर क्षेत्रफलमा फैलिने छ । यस्तै ड्याम बनेपछि पानी भरिन करिब डेढ वर्ष लाग्ने सुनाइएको छ । सरकारले आयोजनालाई अगाडि बढाउन भन्दै यही साता काठमाडौँमा केन्द्रीय कार्यालय समेत स्थापना गरिसकेको छ ।
तीन खर्ब ६० अर्ब रुपैयाँ लागत अनुमान गरिएको आयोजनाबाट वार्षिक तीन अर्ब ३८ करोड ३० लाख युनिट विजुली उत्पादन हुने छ । आठ वर्षमा अयोजना सम्पन्न गर्ने लक्ष्य हो ।
बुढिगण्डकी जलविद्युत कम्पनीको प्रमुख कार्यकारी अधिकृतमा जगत श्रेष्ठ नियुक्त भएका छन् । कम्पनी खुलेर केन्द्रीय र स्थानीय कार्यालय खुले पनि आयोजनाका लागि चाहिने लगानी रकम भने टुङ्गो लागेको छैन । आयोजना बनाउने लक्ष्यसहित हालसम्म करिब ४२ अर्ब खर्च भैसकेको छ । यस्तै, सरकारले बुढिगण्डकीका लागि भन्दै पेट्रोलियम पदार्थबाट प्रतिलिटर १० रुपैयाँका दरले ७२ अर्बभन्दा बढी सङ्कलन गरिसकेको छ ।
अहिले भने सरकारले पूर्वाधार विकास शुल्कका नाममा उक्त रकम उठाउँदै आएको छ । यो आयोजनाको निर्माण कार्य अघि बढेकाले राष्ट्रिय गौरवको आयोजना छिट्टै अघि बढ्ने कम्पनीका प्रमुख सुनाए ।
