काठमाडौं । नेकपा माओवादी केन्द्रका अध्यक्ष प्रधानमन्त्री रहेको मन्त्रिपरिषद्मा पाँच दलका १६ जना नयाँ अनुहार मन्त्री बनेका छन् ।
मंगलबार विस्तार भएको मन्त्रिपरिषद्मा प्रधानमन्त्रीसहित २३ जना पुगेका छन् । सरकारमा नेकपा एमालेबाट आठ, नेकपा माओवादी केन्द्रबाट ६, राष्ट्रिय स्वतन्त्र पार्टीबाट चार, राप्रपाबाट चार र जनमत पार्टीबाट एकजना मन्त्री बनेका हुन् । पुष्पकमल दाहाल ‘प्रचण्ड’ गत १० पुसमा प्रधानमन्त्री नियुक्त भएका थिए भने उनले ११ पुसमा राष्ट्रपति विद्यादेवी भण्डारीसँग पद तथा गोपनीयताको शपथ लिँदै मन्त्रिपरिषद् गठन गरेका थिए ।
दोस्रोपटक भएको मन्त्रिपरिषद् विस्तारसँगै सरकारमा प्रधानमन्त्रीबाहेक २२ जना मन्त्री बनेका छन् । जसमध्ये २० जना पूर्ण मन्त्री तथा तीन जना राज्यमन्त्री छन् ।
सरकारमा माओवादी केन्द्रबाट उपप्रधानसहित भौतिक पूर्वाधार तथा यातायातमन्त्रीमा नारायणकाजी श्रेष्ठ छन् । माओवादी केन्द्रबाट सुदर किराती र अमनलाल मोदी पहिलोपटक मन्त्री बनेका हुन् । किरातीले संस्कृति, पर्यटन तथा नागरिक उड्डयन मन्त्रालयको जिम्मा पाएका छन् भने मोदी संघीय मामिला तथा सामान्य प्रशासनमन्त्री बनेका छन् । सञ्चारमन्त्री बनेकी रेखा शर्मा भने यसअघि पनि सरकारमा मन्त्री भइसकेकी अनुहार हुन् । माओवादी केन्द्रबाट संस्कृति, पर्यटन तथा नागरिक उड्डयन राज्यमन्त्री बनाइएकी शुशिला सिर्पाली ठकुरी पनि नयाँ अनुहार हुन् ।
यसैगरी, नेकपा एमालेबाट उपप्रधानसहित अर्थ मन्त्रालयको नेतृत्व विष्णु पौडेलले सम्हाल्दै आइरहेकामा राजेन्द्रकुमार राई, पदम गिरी, दामोदर भण्डारी, भगवती चौधरी, हरि उप्रेती र बिमला शर्मा पौड्याल पहिलोपटक सरकारमा मन्त्री बनेका हुन् । बिमला राष्ट्रिय सभा सदस्य हुन् भने अन्य प्रतिनिधिसभामा सांसद छन् । सरकारमा राईले भूमि व्यवस्था, सहकारी तथा गरिबी निवारण मन्त्रालयको जिम्मा पाएका छन् । गिरीले स्वास्थ्य, उप्रेतीले रक्षा, भण्डारीले उद्योग वाणिज्य तथा आपूर्ति र पौडेलले परराष्ट्र मन्त्रालय पाएका छन् । ज्वालाकुमारी शाह यसअघि पनि मन्त्री भइसकेकी अनुहार हुन् ।
यसैगरी, राष्ट्रिय प्रजातन्त्र पार्टीबाट अध्यक्ष राजेन्द्रप्रसाद लिङ्देन, महामन्त्री तथा सांसद ध्रुवबहादुर प्रधान पनि पहिलोपटक मन्त्री बनेका छन् । लिङ्देन मन्त्रिपरिषद्मा चौथो वरीयतासहित ऊर्जा, जलस्रोत तथा सिँचाइमन्त्री बन्दैगर्दा प्रधान कानुन न्याय तथा संसदीय मामिलामन्त्री भएका छन् । ऊर्जा राज्यमन्त्री दीपकबहादुर सिंह पनि नयाँ हुन् । राप्रपाबाट यसअघिसमेत मन्त्री भइसकेका विक्रम पाण्डेले शहरी विकास मन्त्रालयको जिम्मा पाएका छन् ।
यस्तै, राष्ट्रिय स्वतन्त्र पार्टीबाट सरकारमा सहभागी सबैजना नयाँ अनुहार हुन् । प्रतिनिधिसभामा राष्ट्रिय स्वतन्त्र पार्टीले २० सिट जितेको थियो । मन्त्रिपरिषद्मा रास्वपाबाट उपप्रधान एवं गृहमन्त्री रवि लामिछाने, शिक्षा, विज्ञान तथा प्रविधिमा शिशिर खनाल र श्रम, रोजगार तथा समाजिक सुरक्षामन्त्रीमा डोलप्रसाद अर्याल नियुक्त भएका हुन् । यस्तै, स्वास्थ्य राज्यमन्त्री डा. तोसिमा कार्कीलाई जिम्मा दिइएको छ । उनी पनि नयाँ अनुहार हुन् ।
यसैगरी, जनमत पार्टीका अब्दुल खानले पनि पहिलोपटक मन्त्री बन्ने अवसर पाएका हुन् । नवनियुक्त मन्त्रीहरूलाई राष्ट्रपति कार्यालयमा आयोजित कार्यक्रममा राष्ट्रपति विद्यादेवी भण्डारीले पद तथा गोपनीयताको शपथ गराएकी थिइन् ।
प्रतिक्रिया लेख्नुहोस्:-