पोखरा , नेपाली कांग्रेस पोखरा महानगरसमितिका उपसभापति भवसागर बरालले पार्टीको महाधिवेशनबाट निर्वाचित भएपछि एक वर्षको अवधीमा समितिले रचनात्मक काम गरिरहेको बताएका छन ।

गण्डकी प्रदेश सरकारले जनताको हित विपरीत र मन लाग्दो निर्णय गरेपछि मुख्य मन्त्रीकै कार्यालयमा तालाबन्दी गर्ने सम्मको चेतावनी दिएको स्मरण गर्दै बरालले जनतालाई प्रत्यक्ष सुबिधा पुग्ने गरि काम गर्न आफुहरु गम्भिर रहेको स्पष्ट पारेका छन ।

पोखरा महानगरपालिकाका नव निर्वाचित प्रमुख धनराज आचार्यलाई पटक पटक पोखराको फोहरमैला व्यवस्थापन र पार्किंग व्यवस्थापन गर्न माग गरिरहेको तर कमिशनको प्रभाव वा अन्य प्रभावमा परेर हो कि के हो मेयरले कांग्रेसले भने अनुसार काम नगरेको गुनासो गरे ।

कर्मचारी व्यवस्थापन लगायतका विषयमा मेयर गम्भिर नबने तालाबन्दी गर्न समेत पछि नपर्ने उपसभापति बरालको भनाई छ । प्रतिनिधि सभा र प्रदेश सभाको मंसीर ४ गते सम्पन्न निर्वाचन पछि पहिलो पटक यही पुस ७ गते कांग्रेस महानगर समितिको बैठक बस्ने जानकारी दिंदै उपसभापति बरालले भने “ पार्टीका उमेदवारहरु हराउन पार्टीकै केही नेताहरुले नांगो नाचे, त्यसको प्रमाण हामीहरुसंग समेत छ , पार्टीका उमेदवार हराउन लाग्नेहरुलाई साधारण सदस्यबाट नै हटाएर कारबाही गर्न महानगर समितिले आवश्यक निर्णय गर्ने छ”

महानगर समितिले ज़िम्मेवार पदमा बसेका हरुले आंफुले टिकट पाए ठिक अरुले पाएपछि हराउने अभियानमा लाग्ने हरुलाई कारवाही गर्न पार्टीको जिल्ला समितिसंग माग गर्ने र जिल्लाले कारबाही गर्न नसके सिधा केन्द्रमा माग गर्ने समेत बरालले बताए । “ आवश्यक परे हामी केन्द्रमा डेलीगेशन समेत जानेछौं” बरालले जोड़ दिए ।