काठमाडौँ, आगामी मङ्सिर ४ गते हुने प्रतिनिधि सभा र प्रदेश सभा निर्वाचनमा केन्द्रीय विद्यार्थी सङ्गठनको राजनीतिक पृष्ठभूमिबाट आएका उम्मेदवार उल्लेख्य छन् ।
प्रमुख दल नेपाली कांग्रेस, नेकपा (एमाले), नेकपा (माओवादी केन्द्र)लगायत साना दलले समेत पार्टीको ‘नर्सरी’ मानिने विद्यार्थी सङ्गठनलाई आधार बनाएर उदाएका व्यक्तिलाई सङ्घीय र प्रदेश सभा सदस्यको उम्मेदवार बनाएका छन् । यसरी प्रतिस्पर्धामा आएकामध्ये केही पार्टीको केन्द्रीय राजनीतिमा जमिसकेका छन् । केही भने भर्खरै चुनावी अनुभव लिँदै छन् ।
प्रधानमन्त्री शेरबहादुर देउवा नेपाल विद्यार्थी सङ्घको संस्थापक सभापति हुनुहुन्छ । उहाँ डडेल्धुराबाट प्रतिनिधि सभा सदस्यको उम्मेदवार बन्नुभएको छ । सङ्घकै पूर्वअध्यक्ष तथा गृहमन्त्री बालकृष्ण खाण रुपन्देही क्षेत्र नम्बर ३ बाट तथा पूर्वअध्यक्ष बलबहादुर केसी सोलुखुम्बुबाट प्रतिनिधि सभा सदस्यको उम्मेदवार हुनुहुन्छ ।
कांग्रेस महामन्त्री विश्वप्रकाश शर्मा पनि नेविसङ्घका पूर्वअध्यक्ष हुनुहुन्छ । उहाँ झापा क्षेत्र नम्बर १ बाट प्रतिनिधि सभा सदस्यको उम्मेदवार बन्नुभएको छ । काठमाडौँ क्षेत्र नम्बर ४ बाट प्रतिनिधि सभाको उम्मेदवार बन्नुभएका पार्टीका महामन्त्री गगन थापा पनि सङ्घको पूर्वमहामन्त्री हुनुहुन्छ ।
सङ्घका पूर्वअध्यक्षहरू धनराज गुरुङ र किशोरसिंह राठौर क्रमशः स्याङ्जा क्षेत्र नम्बर २ तथा बाँके क्षेत्र नम्बर ३ बाट प्रतिनिधि सभा सदस्यको उम्मेदवार रहनुभएको नेविसङ्घका अध्यक्ष दुजाङ शेर्पाले जानकारी दिनुभयो ।
त्यस्तै काठमाडौँ क्षेत्र नम्बर ५ बाट प्रतिनिधि सभा सदस्यको उम्मेदवार बन्नुभएका प्रदीप पौडेल तथा कञ्चनपुर क्षेत्र नम्बर २ बाट प्रतिनिधि सभा सदस्यको उम्मेदवार रहनुभएका एनपी साउद पनि सङ्घको पूर्वअध्यक्ष हुनुहुन्छ ।
सङ्घका पूर्वकेन्द्रीय उपाध्यक्ष जित शेरचन बागलुङ क्षेत्र नम्बर २ अन्तर्गत प्रदेश सभा (ख)बाट प्रदेश सभा उम्मेदवार बन्नुभएको छ । अध्यक्ष शेर्पाका अनुसार सङ्घका पूर्वउपाध्यक्ष डम्बर आङ्देम्बे इलाम क्षेत्र नम्बर २ को प्रतिनिधि सभा सदस्यको उम्मेदवार बन्नुभएको छ । सङ्घका पूर्वमहामन्त्री कुन्दनराज काफ्ले दोलखाको प्रदेश (क), पूर्वउपाध्यक्ष डिल्लीराज सुवेदी बागलुङ क्षेत्र नम्बर १ को (ख)बाट उम्मेदवार बन्नुभएको छ ।
नेकपा (एमाले)ले पनि अनेरास्ववियुको पूर्वअध्यक्षदेखि केन्द्रीय कमिटीमा रहेर राजनीति गरेकालाई सङ्घ र प्रदेश सभाको सदस्य बनाएको छ । दाङ क्षेत्र नम्बर २ बाट प्रतिनिधि सभा सदस्यको उम्मेदवार बन्नुभएका शङ्कर पोखरेल पार्टीका महासचिव तथा अनेरास्ववियुका पूर्वअध्यक्ष हुनुहुन्छ ।
सङ्गठनकै पूर्वअध्यक्ष तथा पार्टीका सचिव योगेश भट्टराई ताप्लेजुङबाट प्रतिनिधि सभाको उम्मेदवार बन्नुभएको छ । उहाँ २०७४ सालको प्रतिनिधि सभा निर्वाचनमा पनि सोही क्षेत्रबाट निर्वाचित हुनुभएको थियो । अनेरास्ववियुकै केन्द्रीय कमिटीमा रहेर काम गरिसक्नुभएका र महेन्द्ररत्न क्याम्पस स्वतन्त्र विद्यार्थी युनियनको सभापति बन्नुभएका विशाल भट्टराई खोटाङबाट प्रतिनिधि सभा सदस्यको उम्मेदवार बन्नुभएको छ ।
हाल प्रदेश १ का मुख्यमन्त्री राजेन्द्र राई पनि तत्कालीन नेकपा (एमाले)निकट अनेरास्ववियुकै पूर्वअध्यक्ष हुनुहुन्छ । उहाँ हाल नेपाल कम्युनिस्ट पार्टी (एकीकृत समाजवादी)मा आबद्ध हुनुहुन्छ । उहाँ सोही पार्टीको तर्फबाट भोजपुर क्षेत्र नम्बर (क)बाट प्रदेश सभा सदस्यको उम्मेदवार बन्नुभएको छ । सङ्गठनकै पूर्वअध्यक्ष रामकुमारी झाँक्री अहिले नेकपा (एकीकृत समाजवादी)को तर्फबाट गुल्मी क्षेत्र नम्बर २ बाट प्रतिनिधि सभा सदस्यको उम्मेदवार बन्नुभएको छ सङ्गठनकै पूर्वअध्यक्ष हिक्मत कार्की झापा क्षेत्र नम्बर ५ को प्रदेश (क)बाट, पूर्वअध्यक्ष ठाकुर गैरे पाल्पा क्षेत्र नम्बर २ बाट, पूर्वअध्यक्ष ऐन महर बझाङबाट तथा पूर्वउपाध्यक्ष महेश बर्तौला मकवानपुर क्षेत्र नम्बर २ बाट प्रतिनिधि सभा सदस्यको उम्मेदवार बन्नुभएको छ । सङ्गठनका वर्तमान अध्यक्ष सुनिता बराललाई भने एमालेले प्रतिनिधि सभातर्फ समानुपातिक उम्मेदवारको सूचीमा राखेको छ ।
सङ्गठनका पूर्वउपाध्यक्ष रहनुभएका विनोद ढकाल मोरङ क्षेत्र नम्बर ४ बाट, पूर्वमहासचिव भानुभक्त ढकाल मोरङ क्षेत्र नम्बर ३ बाट प्रतिनिधि सभा सदस्यको उम्मेदवार बन्नुभएको छ ।
अनेरास्ववियुकै केन्द्रीय कमिटीमा लामो समयसम्म विभिन्न भूमिकामा रहनुभएका यज्ञराज सुनुवार ओखलढुङ्गाबाट प्रतिनिधि सभाको उम्मेदवार बन्नुभएको छ ।
अनेरास्ववियुका अध्यक्ष सुनिता बरालले भन्नुभयो, “पार्टीले युवा र विद्यार्थी राजनीतिबाट उदाएका धेरैलाई प्रतिनिधि सभा र प्रदेश सभा सदस्यको उम्मेदवार बनाएको छ । जुन सकारात्मक पक्ष हो ।”
माओवादी केन्द्रले अनेरास्ववियु (क्रान्तिकारी)का पूर्वअध्यक्ष तथा पार्टीका महासचिव देव गुरुङलाई लमजुङबाट प्रतिनिधि सभा सदस्यको उम्मेदवार बनाएको छ । त्यस्तै पूर्वअध्यक्ष देवेन्द्र पौडेल बागलुङ क्षेत्र नम्बर २ बाट तथा सङ्गठनकै पूर्वकेन्द्रीय सदस्य शक्ति बस्नेत जाजरकोटबाट प्रतिनिधि सभा सदस्यको उम्मेदवार बन्नुभएको छ ।
सङ्गठनका पूर्वउपाध्यक्ष गङ्गानारायण श्रेष्ठ र युवराज चौलागाई क्रमशः सिन्धुली क्षेत्र नम्बर २ को प्रदेश (ख) तथा रामेछाप प्रदेश (ख)बाट, पूर्वसचिव तथा बागमती प्रदेशका पूर्वमन्त्री रत्न ढकाल काभे्र प्रतिनिधि सभा क्षेत्र नम्बर १ को (क)बाट प्रदेश सभा सदस्यको उम्मेदवार बन्नुभएको छ ।
अर्का पूर्वउपाध्यक्ष सुदीप कुँवर पर्वतबाट प्रदेश सभा सदस्यको उम्मेदवार बन्नुभएको छ । पूर्वमन्त्री तथा सङ्गठनकै पूर्वसचिव कल्पना धमला काठमाडौँ क्षेत्र नम्बर ९ बाट प्रतिनिधि सभा सदस्यको उम्मेदवार बन्नुभएको छ । पूर्वउपाध्यक्ष रामदीप आचार्य प्रतिनिधि सभा सदस्यको समानुपातिक उम्मेदवार हुनुहुन्छ ।
क्रान्तिकारीकै पूर्वकेन्द्रीय सदस्य माधव सापकोटा सिन्धुपाल्चोक क्षेत्र नम्बर १ बाट प्रतिनिधि सभाको सदस्य उम्मेदवार बन्नुभएको छ । सङ्गठनका पूर्वअध्यक्ष रमेश मल्लले भन्नुभयो, “जिल्लाबाट थुप्रै युवा विद्यार्थी नेता प्रतिनिधि तथा प्रदेश सभा सदस्यका लागि सिफारिसमा पर्नुभए पनि वाम लोकतान्त्रिक गठबन्धनका कारण सिफारिसमा पर्नुभएका सबै उम्मेदवार बन्न सक्नुभएन ।”
