पोखरा, ३१बैशाख । पोखरा महानगरपालिकाको मतगणना २ बजेबाट हुने भएको छ । भर्खरै सम्पन्न सर्वदलिय बैठकले दिनको २ बजेबाट मतगणना गर्ने निर्यण गरेको हो ।
बैठकले साढे १२ बजेसम्म प्रतिनिधि पठाउनु पर्ने, प्रतिनिधिहरुको नाम र फोटो १ बजेसम्म उपलब्ध गराउनु पर्ने र साढे १ बजेसम्म वडा अनुसारको मतपेटिका मिलाउने निर्णय गरेको छ । सबै तयारी सकिएपछि २ बजेबाट मतगणना गरिने निर्वाचन आयोगले जनाएको छ । जिल्ला समन्वय समितिको कार्यालय र उपत्यका नगर विकास समितिमा गरि दुई स्थानका आठ ठाउँबाट गणना हुने भएको छ
हिजो सम्पन्न स्थानीय तह निर्वाचनमा पोखरामा करिब ६९ प्रतिशत मत खसेको छ । २ लाख ७ हजार ७ सय १२ मतदातामध्ये १ लाख ४३ हजारले मतदान गरेका हुन् । अघिल्लो स्थानीय निर्वाचन भन्दा करिब ५ प्रतिशतले कम हो ।
अघिल्लो निर्वाचनमा पोखरामा १ लाख ६८ हजार मतदातामध्ये १ लाख २५ हजार ८ सय ५३ मत खसेको थियो । ७४ प्रतिशतभन्दा बढी मत खसेको निर्वाचन कार्यालयले जनाएको छ ।
