पोखरा, यहि भदौ १० गते भोटेकोशी नदीमा आएको आकस्मिक र विनाशकारी बाढीबाट पिडितको उद्धार, राहतका लागि पोखराका व्यवसायी नारायणप्रसाद पौडेल संलग्न तीनवटा प्रतिष्ठानले ४१ लाख ११ हजार १११ रुपैयाँ प्रधानमन्त्री दैवी प्रकोप उद्धार कोषमा कोषमा जम्मा गरेका छन ।
पौडेल सम्बद्ध अटोवेज प्रा.लि, प्रतिभा माध्यमिक विद्यालय र गोविन्द-कलावती फाउन्डेसनले संयुक्त रुपमा उक्त रकम प्रधानमन्त्री दैवी प्रकोप उद्धार कोषमा जम्मा गरेको बुझिएको छ। पौडेलले नेपाल सरकारका अर्थमन्त्री स्वर्णीम वाग्लेलाई उक्त रकम जम्मा गरेको जानकारी पत्रसहित चेकको नमुना हस्तान्तरण गरेका थिए ।
उल्लिखित रकममध्ये अटोवेज प्रा.लि. परिवार र भारतको बुल मसिन्स प्रा.लि.ले २५ लाख रुपैयाँ, पोखराको नदिपुरमा रहेको प्रतिभा माध्यमिक विद्यालयका शिक्षक, कर्मचारी र विद्यार्थीहरुबाट संकलित ११ लाख ११ हजार १११ रुपैयाँ र गोविन्द-कलावती फाउन्डेसनले ५ लाख रुपैयाँ सहयोग गरेको ब्यबसायी पौडेलले गुरुकुल खबरलाई जानकारी दिए।
विपद्को यस घडीमा पीडित नागरिकलाई साथ दिनु निजी क्षेत्र र सामाजिक संस्थाहरुको कर्तव्य भएको प्रतिभा माध्यमिक विद्यालयका अध्यक्ष समेत रहेका पौडेलले बताए । ‘यो निकै कठिन र पीडादायी अवस्था हो, यस्तो बेला केवल सहयोग मात्र नभई हाम्रो मानवीय दायित्व पनि जोडिएको छ,’ उनले भने । उनले देश दुखेका बेला एक अर्कालाई साथ दिनु नै सबैभन्दा ठूलो धर्म भएको बताए ।
