एजेन्सी, विश्वकप फुटबलको यस अगाडिको बिजेता अर्जेन्टिना स्विजरल्याण्डलाई हराउंदै सेमीफाइनलमा प्रवेश गरेको छ । अमेरिकाको कान्सास सिटी स्टेडियममा आइतबार बिहान भएको अन्तिम क्वार्टरफाइनल खेलमा स्विट्जरल्यान्डलाई ३–१ ले पराजित गर्दै अर्जेन्टिना सातौंपटक विश्वकपको सेमिफाइनलमा प्रवेश गरेको हो ।

अब सेमिफाइनलमा अर्जेन्टिनाको भेट इंल्यान्डसँग हुने निश्चित भएको छ। अर्को सेमिफाइनलमा फ्रान्स र स्पेन भिड्नेछन्। विवादास्पद बनेको यस खेलको अतिरिक्त समयमा जुलियन अल्भारेजले ११२ मिनेटमा २५ गज टाढाबाट प्रहार गरेको एक उत्कृष्ट गोलको मद्दतले अर्जेन्टिनाले अग्रता लिएको थियो। स्वीस गोलरक्षक ग्रेगोर कोबेलले सो प्रहार रोक्ने कुनै मौका नै पाएनन्। त्यसपछि अन्तिम समयमा लाउटारो मार्टिनेजले तेस्रो गोल गरेर अर्जेन्टिनाको जित सुनिश्चित गरे।

१० खेलाडीमा सीमित भएर पनि बहादुरीपूर्वक लडेको स्वीट्जरल्याण्डका लागि यो हार निकै पीडादायी रह्यो। खेलको दोस्रो हाफमा स्ट्राइकर ब्रिल एम्बोलोले ‘डाइभिङ’ (फाउल भएको नाटक) गरेको भन्दै भिडियो असिस्टेन्ट रेफ्रीको निर्णयपछि उनलाई दोस्रो पहेँलो कार्ड दिँदै मैदानबाट बाहिर पठाइएको थियो।

सुरुमा लियान्द्रो पारेडेसले एम्बोलोलाई फाउल गरेको देखिएपछि पारेडेसलाई पहेँलो कार्ड दिइएको थियो। तर, भारले रेफ्रीलाई पुनः जाँच गर्न आग्रह गर्‍यो, जहाँ रिप्लेमा स्वीस खेलाडी एम्बोलोले नै लडेको नाटक गरेको स्पष्ट देखियो। फलस्वरूप पारेडेसको कार्ड खारेज गरियो र एम्बोलोलाई रातो कार्ड दिइयो, जसले स्वीस टोलीमा आक्रोश पैदा गर्‍यो। एम्बोलोले रातो कार्ड पाउनु ठीक ५ मिनेटअघि मात्र स्वीट्जरल्याण्डले बराबरी गोल गरेको थियो।

खेलको १०औँ मिनेटमै लियोनेल मेसीको कर्नरमा एलेक्सिस म्याक एलिस्टरले हेडमार्फत गोल गर्दै अर्जेन्टिनालाई सुरुवाती अग्रता दिलाएका थिए। तर, ६७औँ मिनेटमा डान एनडोएले गोल गर्दै खेललाई १-१ को बराबरीमा ल्याएका थिए। एम्बोलोले मैदान छाडेपछि अर्जेन्टिना खेलमा हावी भयो। निकै लामो संघर्षपछि अल्भारेजको जादुमयी गोलले अर्जेन्टिनालाई अग्रता दिलायो।

अन्तिम समयमा स्वीट्जरल्याण्डले बराबरी गोलका लागि दबाब दिइरहेका बेला काउन्टर अट्याकमा लाउटारो मार्टिनेजले अर्को गोल थप्दै अर्जेन्टिनाको ३-१ को जित सुनिश्चित गरे। यो जितसँगै अर्जेन्टिनाको लगातार दोस्रो पटक विश्वकप जित्ने सपना जीवितै रहेको छ।