पोखरा, पोखरा पर्यटन परिषद्ले हरेक बर्ष गर्दै आएको असारे रोपाइँ महोत्सब यस बर्ष पोखरा महानगरपालिका -३० शिशुवामा हुने भएको छ। २१ औं संस्करणको असारे रोपाइँ महोत्सब-२०८३ को बारेमा जानकारी दिन परिषद्ले बुधबार आयोजनागरेको पत्रकार सम्मेलनमा उक्त जानकारी दिईएको हो ।

‘पोखरा – सबै मौसमका लागि‘ भन्ने मूल नाराका साथ असर १५ मा हुँदै आएको महोत्सब यस बर्ष भने असार १४ गते हुने भएको छ असार १५ गते पुर्णिमाको दिन परेको र पूर्णिमाका दिन कृषकले हलो नचलाउने परम्परा रहेकाले असार १४ गते नै महोत्सब गरिने भएको  पोखरा पर्यटन परिषद्का अध्यक्ष तारानाथ पहारीले गुरुकुल खबरलाई जानकारी दिए ।

महोत्सवको मुख्य उद्देश्य पोखरा तथा गण्डकी प्रदेशमा आन्तरिक र बाह्य पर्यटन प्रवर्द्धन गर्दै ‘पोखरा भ्रमण वर्ष’लाई सफल बनाउनु रहेको बताउंदै परिषद्का अध्यक्ष पहारीले पर्यटकलाई नेपाली परम्परागत कृषि प्रणालीसँग प्रत्यक्ष साक्षात्कार गराउने, नयाँ पुस्तालाई मौलिक कृषि संस्कृतिबारे जानकारी गराउने तथा पोखरालाई सबै मौसममा घुम्न सकिने गन्तव्यका रूपमा स्थापित गर्ने लक्ष्य लिइएको बताए ।

महोत्सवमा राष्ट्रिय ख्यातिप्राप्त कलाकारहरू राजु परियार, शिवहरी ढुंगाना, जीवन दाहाल, मधु थापा मगर र तुलसा जिसीलगायतको सांगीतिक प्रस्तुति रहने आयोजकले जनाएको छ। त्यस्तै, महोत्सवमा साउने प्रतियोगिता (हल गोरु दौड), असारे भाका सहित रोपाइँ प्रतियोगिता, हिलोमा माछा समात्ने प्रतियोगिता, विदेशी तथा स्वदेशी महिला–पुरुष हिलो दौड प्रतियोगिता, पत्रकार खुला हिलो दौड तथा पुरुष–महिला रस्साकस्सी प्रतियोगिता सञ्चालन गरिनेछ। उत्कृष्ट कृषकलाई सम्मानसमेत गरिने परिषदका महासचिव जीवनराज सापकोटाले जानकारी दिए ।

पोखरा पर्यटन परिषद् मुख्य आयोजक रहेको महोत्सवमा वडास्तरीय कृषि सञ्जाल पोखरा–३० वडा कार्यालय स्थानीय आयोजकका रूपमा रहेको छ। गण्डकी प्रदेश सरकारको उद्योग तथा पर्यटन मन्त्रालय, पोखरा महानगरपालिका, नेपाल पर्यटन बोर्ड गण्डकी प्रदेश कार्यालय तथा पोखरा महानगरपालिका वडा नं. ३० को कार्यालयले कार्यक्रमलाई सहयोग र प्रवर्द्धन गर्नेछन्।

महोत्सवलाई भव्य बनाउन परिषद्का महासचिव जीवनराज सापकोटाको संयोजकत्वमा ४३ सदस्यीय मूल आयोजक समिति तथा विभिन्न उपसमिति गठन गरिएको छ। परिषद्का अनुसार तीव्र शहरीकरणका कारण लोपोन्मुख बन्दै गएको परम्परागत धान खेती प्रणालीको संरक्षण, कृषिप्रति युवापुस्तालाई आकर्षित गर्ने तथा कृषि पर्यटनको प्रवर्द्धन गर्ने उद्देश्यले महोत्सवलाई निरन्तरता दिइएको हो। पोखरा वरपर रहेका खेतीयोग्य जमिनको संरक्षण, कृषकलाई सम्मान तथा ‘हिलोमा एक पटक, देशको माया सय पटक’ भन्ने मान्यतालाई जीवन्त बनाउने अभियानका रूपमा पनि महोत्सवलाई लिइएको छ।