पोखरा, पाल्पा जिल्लाको माथागढी गाउँपालिकामा एउटा खालि टिप्पर दुर्घटना हुँदा टिप्परका चालक सहित चारजनाको ज्यान गएको छ माथागढी गाउँपालिका –४ झडेवाबाट वडा नम्बर ७ रहबासतर्फ रहेको चुनढुंगा खानीतर्फ जाँदै गरेको लु २ ख ४५२५ नम्बरको खाली टिप्पर गएराती दुर्घटनामा परेको हो। दुर्घटनामा चालक सहित चार जना सवार रहेकोमा चार जनाकै ज्यान गएको हो । दुर्घटनाग्रस्त टिप्पर सडकदेखि करिब ५० मिटर तल खसेको प्रहरीले जनाएको छ।
दुर्घटनामा परि ज्यान गुमाउनेहरुमा अर्घाखाँची जिल्लाको सितगंगा नगरपालिका–४ सिद्दाराका २६ वर्षीय चिन्ताबहादुर सुनार (चालक), सोही स्थानका २६ वर्षीय सुनिल बि.क., रुपन्देही जिल्लाको देवदह नगरपालिका–२ खैरेनीका २६ वर्षीय सुनिल नेपाली र पाल्पा जिल्लाको तानसेन नगरपालिका–१० का ३३ वर्षीय राजन चिदी रहेका छन्।
दुर्घटनामा गम्भीर अबस्थामा भेटिएका चार जनालाई उपचारका लागि तानसेनस्थित लुम्बिनी मेडिकल कलेज, प्रभास लगिएको भएपनि तीन जनालाई चिकित्सकले मृत घोषणा गरेका थिए भने गम्भीर घाइते भएका चिदीलाई उपचारका लागि भैरहवा मेडिकल कलेज, रुपन्देही रिफर गरिएकोमा उपचारका क्रममा मृत्यु भएको जिल्ला प्रहरी कार्यालय पाल्पाका प्रहरी नायव उपरीक्षक होमप्रकाश चौधरीले जानकारी दिए।
तस्बिर – माधव अर्याल / कान्तिपुर
