पोखरा, नेपाल पर्यटक यातायात व्यवसायी संघ (एनटिभिए) गण्डकी प्रदेशको सातौं वार्षिक साधारणसभा तथा चौथो अधिवेशन सम्पन्न भएको छ अधिबेशनले रविप्रसाद आचार्यको अध्यक्ष रहेको नयाँ कार्यसमिति सर्वसम्मत निर्वाचित गरेको छ । नयाँ कार्यसमितिको प्रथम उपाध्यक्षमा विकासप्रसाद कंडेल, द्वितीय उपाध्यक्षमा भुवानीप्रसाद अधिकारी, महासचिवमा श्यामप्रसाद लामिछाने, सचिवमा शोभाखर तिवारी, कोषाध्यक्षमा सुमन कुँवर र सह कोषाध्यक्षमा संगीता अधिकारी आचार्यलाई निर्वाचित गरेको छ ।

त्यस्तै समितिको सदस्यहरूमा आनन्दराज अधिकारी, रविन्द्र कुँवर, मित्रलाल अधिकारी, प्रतिक लामिछाने र सुरज सापकोटा रहनुुभएको छ । अधिवेशनका लागि बरिष्ठ अधिवक्ता कृष्णबहादुर थापाको संयोजकत्वमा भीमबहादुर गोले तामाङ, मदन शर्मा, सोमबहादुर थापा, महेश सापकोटा, बोबरजंग गुरुङ, बाबुराम पाण्डे रहनुुभएको निर्वाचन समिति गठन गरिएको थियो ।

नवनिर्वाचित कार्यसमितिका पदाधिकारी र सदस्यहरुलाई निर्वाचन समितिका पदाधिकारी सहित निवर्तमान अध्यक्ष दुुर्गादत्त दाहाल, पोखरा पर्यटन परिषद्का अध्यक्ष तारानाथ पहारी, नेपाल पर्यटन बोर्ड गण्डकी प्रदेशका प्रमुख मणिराज लामिछाने लगायतले खादा तथा माला लगाएर बधाई तथा शुभकामना व्यक्त गरेका थिए ।

नवनिर्वाचित अध्यक्ष रविप्रसाद आचार्यले पर्यटक यातायात सेवालाई गुणस्तरीय बनाउँदै हरियो नम्बर प्लेटको महिमा र गरिमालाई कायम गराउने कुरामा आँफूहरू निरन्तर लाग्ने विश्वास व्यक्त गरे ।

अग्रज पर्यटन ब्यबसायी तुलाचन र पत्रकार पौडेललाइ सम्मान 

अधिवेशनको उद्घाटन समारोहमा पर्यटक यातायात सहित समग्र पर्यटन क्षेत्रको प्रबर्द्दन र विकासमा योगदान पुर्याएको भन्दै रासस गण्डकी प्रदेश प्रमुख वासुदेव पौडेल र गण्डकी प्रदेशमा पहिलो पटक हरियो नम्बर प्लेटको पर्यटक यातायात भित्राउने हरिध्वज तुलाचनका साथै कर्मचारीहरु श्रीप्रसाद खतिवडा र इन्द्र राना मगरलाई सम्मान गरिएको थियो ।

कार्यक्रममा एनटिभिए गण्डकी प्रदेशका अध्यक्ष दुर्गादत्त दाहाल, एनटिभिए गण्डकी प्रदेशका पूर्व अध्यक्ष एवम् सल्लाहकार बोबरजंग गुरुङ लगायतले विदेशी सवारी साधनलाई व्यवस्थित गर्नका लागि संघले पहल गरेपनि त्यसलाई गलत व्याख्या गरिएको बताउंदै पर्यटक सवारी साधनले तिर्ने गरेको राजस्व विदेशी सवारी साधनले पनि तिर्नुुपर्ने र राम्रो नियमन हुनुपर्नेमा जोड दिएका थिए ।

संस्थाका महासचिब विकासप्रसाद कंडेल, बरिष्ठ उपाध्यक्ष एवम् कार्यक्रम संयोजक रविप्रसाद आचार्य, एनटिभिए केन्द्रका अध्यक्ष भीमबहादुर गोले तामाङ, महासचिव भरत तिमल्सिना, पोखरा भ्रमण वर्ष कार्यसम्पादन समितिका संयोजक गोपिबहादुर भट्टराई, पोखरा पर्यटन परिषद्का अध्यक्ष तारानाथ पहारी, सम्मानित व्यक्तित्व हरिध्वज तुलाचन लगायतले पर्यटक यातायातले नेपालको पर्यटकको लागि पुर्याएको सेवाको बारेमा चर्चा गरेका थिए ।