पोखरा, पोखरामा पहिलोपटक शुक्रबारदेखि १८ डी सिनेमा सञ्चालनमा आएको छ । फ्लाइ नेपाल इन्टरटेनमेन्टले पोखराको लेकसाइडमा साहसिक गतिविधिका लागि मनोरञ्जनका लागि नयाँ आयामको रुपमा चिनिएको १८ डी सिनेमा संचालनमा ल्याएको हो । १८ डी सिनेमा नेपालमा काठमाडौँ पछि पहिलो पटक पोखरामा संचालन गरिएको फ्लाइ नेपाल इन्टरटेनमेन्टले जनाएको छ।

पोखराको लेकसाइड स्थित डिज्नील्याण्डमा सञ्चालनमा ल्याइएको १८ डी सिनेमाको उद्घाटन बरिष्ठ कलाकार राजेश हमालले शुक्रबार गरेका हुन । हमालले १८ डी सिनेमाको संचालनसंगै सिनेमाको सहर पोखराले फरक शैलीको अनुभव गर्न पाउने बताए । ‘पोखरा आफैंमा सुन्दर सहर हो । यहाँ धेरै सिनेमा सुटिङ हुने गर्छन् । सिनेमाको विजनेशको हिसाबले पनि पोखरालाई राम्रो मानिन्छ । यो सिनेमा मात्र नभएर एउटा नयाँ संसारको यात्रा हो,’ उनले भने ।

फ्लाइ नेपाल इन्टरटेनमेन्टका प्रमुख राम थापाले काठमाडौंमा सफलतापूर्वक सञ्चालनपछि दर्शकको अत्यधिक माया र सकरात्मक प्रतिक्रियाले पोखरामा विस्तार गरिएको जनाए । काठमाडौंको भन्दा पोखराको १८ डी प्रविधिमा राम्रो रहेको उनको भनाइ छ । उच्च प्रविधि र सिर्जनात्मक कथालाई संयोजन गर्दै आम दर्शकलाई नयाँ किसिमको मनोरञ्जनको अनुभव प्रदान गर्नु फ्लाइ ओभरको लक्ष्य रहेको उनले सुनाए ।

फ्लाइ नेपाल इन्टरटेनमेन्टका निर्देशक हिमाल थापाले साहसिक गतिविधिको सहर पोखरामा सिनेमाको अनुभव अझै फराकिलो बन्ने बताए । ‘अब पोखरेली दर्शकले साहसिकता केवल बाहिरी संसारमा मात्र नभई भित्री रुपमा पनि अनुभूत गर्न पाउँछन्,’ उनले भने। ‘यो सिनेमाका धेरै विशेषता छन् । १० देखि ३० मिनेटसम्म रोमाञ्चक फिल्मको अनुभव गर्न सकिन्छ । कुनै चश्मा वा हेडसेट बिना पनि प्रत्यक्ष अनुभति लिनको लागि सबै उमेर समूहलाई उपयुक्त हुने बताइन्छ।