पोखरा, बैंकिङ्ग कसुर गरेको अभियोगमाा प्रभु बैंकका कर्पोरट एण्ड प्रोजेक्ट फाइनान्स विभागका प्रमुख दिनेश डङ्गोललाई प्रहरीले पक्राउ गरेको छ। नेपाल प्रहरीको साइबर व्यूरोले डंगोललाई नियन्त्रणमा लिएको बुझिएको छ।

प्रभु बैंकको महत्वपूर्ण मानिने कर्पोरट एण्ड प्रोजेक्ट फाइनान्स विभागमा कार्यरत डङ्गोलले नेपाल राष्ट्र बैंकबाट जारी भएको निर्देशन तथा प्रचलित कानून विपरित कार्य गरेको तथा प्रभु म्यानेजमेन्ट प्रालि समेतमा ऋण प्रबाह गर्ने क्रममा कर्जा दुरुपयोग गरेको पाइएको प्रहरीले जनाएको छ।

डङ्गोलमाथि जिल्ला अदालत काठमाडौंबाट अनुमति लिएर थप अनुसन्धान भइरहेको ब्यूरोका सूचना अधिकारी शिवकुमार श्रेष्ठले संचारकर्मीहरुलाई जानकारी दिए।ब्यूरोले प्रतिवादी अशोक शेरचन समेत माथि अनुसन्धान भइरहेको बेला थप तथ्य प्राप्त भएपछि डङ्गोललाई पक्राउ गरेको बुझिएको छ।