पोखरा, कास्की क्षेत्र नम्बर -३ बाट प्रतिनिधि सभा सदस्यमा नेपाली काँग्रेसको तर्फबाट उमेदवारी दिएका मनोज गुरुङले आफू निर्वाचित भए आगामी पाँच वर्षभित्र निर्वाचन क्षेत्रका सबै वडा कार्यालयसम्म पक्की सडक पुर्याउने प्रतिबद्धता जनाएका छन् । चुनावी घरदैलो अभियानका क्रममा मतदाताहरूसँग अन्तरक्रिया गर्दै गुरुङले वडा कार्यालय जोड्ने सडक सञ्जाललाई पहिलो प्राथमिकतामा राखेको बताएका हुन् । उनले सांसदको भूमिका नीति निर्माणमा केन्द्रित हुने भए पनि आफ्नो क्षेत्रको पूर्वाधार विकासका लागि संसदबाटै विशेष पैरवी गर्ने स्पष्ट पारे ।
‘हाम्रो क्षेत्रका ३१ वटै वडाका केन्द्रसम्म कालोपत्रे वा ढलान सडक पुर्याउनु मेरो मुख्य लक्ष्य हो,’ गुरुङले भने, ‘म निर्वाचित भएपछि पाँच वर्षभित्र सबै वडा कार्यालयमा पक्की सडक पुग्ने गरी नीतिगत व्यवस्था गर्न र बजेट विनियोजन गर्न म लाग्नेछु ।’ कास्की क्षेत्र नम्बर ३ अन्तर्गत ३१ वटा वडाहरू पर्दछन् । तीमध्ये सबै वडामा सडकको ट्याक खुलिसकेको छ । तर, अन्नपूर्ण गाउँपालिकाका अधिकांश वडा र माछापुच्छ्रे गाउँपालिकाका ४ वटा वडामा अझै पनि पक्की सडक पुग्न सकेको छैन । संघ, प्रदेश र स्थानीय गरी तीनै सरकारको समन्वयमा सडक कालोपत्रे र ढलान गर्ने उनको प्रतिबद्धता छ ।
गुरुङले ती क्षेत्रहरूमा बाह्रै महिना सहज यात्रा गर्न मिल्ने गरी सडक स्तरोन्नति गर्ने योजना अघि सारेका छन् । ‘हामी सांसदका लागि चुनाव लड्दैछौं । मैले यो विकास गर्छु भन्ने होइन, विकासको नीति बनाउने हो,’ उनले भने, ‘आफ्ना जनप्रतिनिधिसँग जनताका विकासे अपेक्षाहरु पनि हुन्छन् । जनताका विकासे आपेक्षाहरूलाई सम्बोधन गर्न म नीतिगत पैरवी गर्नेछु ।’
उनले ग्रामिण भेगका सडकहरू वर्षायाममा हिलाम्मे भएर एम्बुलेन्स समेत नगुड्ने अवस्थाको अन्त्य गर्ने प्रतिबद्धता जनाए । ‘गाउँका बिरामीलाई अस्पताल लैजाँदा बाटोमै एम्बुलेन्स फस्ने दिनको अन्त्य हुनुपर्छ । त्यसका लागि म बाह्रै महिना चल्ने सडक निर्माणका लागि सम्बन्धित निकायमा निरन्तर दबाब दिनेछु,’ उनले भने ।
लामो समय समाजसेवामा सक्रिय रहेर पहिलोपटक संसदीय राजनीतिमा होमिएका गुरुङले आफू निर्वाचित भएपछि पार्टीगत पूर्वाग्रह नराख्ने स्पष्ट पारेका छन् । उनले यसअघिका जनप्रतिनिधिले सुरु गरेका तर पूरा नभएका अधुरा योजनाहरूलाई पनि अपनत्व लिएर पूरा गर्ने बताए । ‘जसले सुरु गरेको भए पनि योजना यही भूगोलका लागि हुन् । यहाँका जनताका लागि हुन् । विकासमा राजनीति गर्नु हुँदैन,’ गुरुङ भन्छन्, ‘अधुरा र अपुरा रहेका सबै योजनाको जिम्मा म लिन्छु ।
आवश्यकता र प्राथमिकताका आधारमा तिनलाई पूर्णता दिने दायित्व मेरो हो ।’ स्थानीयको माग र आवश्यक्ताकै आधारमा विकास निर्माणका कामलाई प्राथमिकता दिने उनको प्रतिबद्धता छ । कतिपय विकासका योजनाहरुमा संरक्षण क्षेत्र बाधक बनेको भन्दै उनले त्यसमा भएका गाँठा फुकाउन पनि संसद र सरकारको ध्यानाकर्षण गराउने बताए ।
कास्की= ३ का अधिकांश भुगोल अन्नपूर्ण संरक्षण क्षेत्रभित्र पर्छन् । जसका कारण धेरैजसो सडकहरु फराकीला हुन सकेका छैनन् । मतदातासँगको भेटघाटमा अधिकाश मतदाताले उनलाई स्वागत गर्दै जितको शुभकामना समेत दिएका छन् । बिभिन्न सामाजिक संघसंस्थामा काम गरेका मनोज पहिलो पटक संसदीय निर्वाचनमा भाग लिएका हुन् । कांग्रेसका गुरुङलाई कास्की- ३ मा बलियो उम्मेद्वारको रुपमा लिईएको छ ।
