पोखरा, पोखराको फेवातालमा स्थानीय जलारीले माछा मार्न थापेको जालमा १८ राउण्ड गोलि समेत लोड गरेको एसएलआर राइफल भेटिएको छ । पोखरा महानगरपालिका वडा नं. १८ खपौदीस्थित फेवातालमा माछा मार्ने क्रममा एक थान एसएलआर राईफल र त्यसमा लोड भएको १८ राउण्ड गोलीसहितको म्यागजिन फेला परेको हो ।

यहि माघ २९ गते बिहिबार साँझ ५ बजेको समयमा पोखरा महानगरपालिका वडा नं. १८ खपौदी नजिक फेवातालमा स्थानीय ४२  बर्षीय कुमार जलारीले माछा मार्नको लागि जाल हान्दा उक्त राइफल फेला परेका कास्की जिल्ला प्रहरी कार्यालयका सूचना अधिकारी एबम प्रहरी नायब उपरिक्षक हरी बहादुर बस्नेतले गुरुकुल खबरलाई जानकारी दिए ।

उक्त सुचना पाएपछि नेपाल प्रहरीको पोखरास्थित गण्डकी प्रदेश कार्यालय, जिल्ला प्रहरी कार्यालय कास्की र वडा प्रहरी कार्यालय बैदामबाट प्रहरी टोली अनुसन्धानको लागि खटिएको बताइएको छ । प्रहरीका अनुसार जलारीले तालमा माछा मार्नका लागि तालमा जाल हान्दा जालमा केही भारी वस्तु अड्किएको थाहा पाएको र त्यसपछि जाल तान्दा उक्त राइफल निस्किएको थियो ।

बरामद गरिएको हतियारमा मु वा १११ (बट) नम्बर र बडी नं. १३८१० उल्लेख गरिएको छ । जालमा हतियारसँगै सोही हतियारमा लोड हुने १८ राउण्ड गोलीसहितको एक थान म्यागजिन पनि फेला परेको छ ।  माछा मार्न हानेको जालमा हतियार फेला परेको जानकारी पछि खटिएको प्रहरीको टोलीले हतियार बरामद गरेर ल्याएको प्रनाउ बस्नेतले बताए । उक्त हतियार कुन सुरक्षा निकाय अन्तर्गत कसको हो भन्ने अनुसन्धानको क्रममै रहेको पनि बस्नेतले बताए ।