काठमाडौँ,  काठमाडौँमा शुक्रबार भएको प्रदर्शनका क्रममा तिनकुने र कोटेश्वर लगायतका क्षेत्रमा सार्बजनिक सम्पतिमा तोडफोड र आगजनी गरिएको साथै वातावरण प्रदूषण गरेको भन्दै काठमाडौँ महानगरपालिकाले पुर्ब राजा ज्ञानेन्द्र शाहलाई करिब आठलाख रुपैया जरिवाना तिर्न पत्र पठाएको छ ।

पूर्वराजा ज्ञानेन्द्र शाहको नाममा काठमाडौँ महानगरपालिकाले ८ वटा पत्र पठाएर सात लाख ९३ हजार रुपैया बुझाउन भनेको छ । राजधानीको तीनकुने क्षेत्रमा प्रदर्शन गरेका राजाका समर्थकले वातावरण प्रदूषण गरेको लगायतका शीर्षकमा महानगरले सो रकम बराबरको जरिवाना गर्ने निर्णय गरेको हो।

पुर्बराजाको सहमतिमा राजवादीले राजधानीको तीनकुने क्षेत्रमा प्रदर्शन गर्ने क्रममा फोहोरमैला गरेको लगायतका कारण देखाउँदै जरिवाना र क्षतिपूर्ति माग गर्दै महानगरले पत्र काटेको हो । शुक्रबार भएको राजावादीहरुको आन्दोलनका क्रममा तीनकुने, कोटेश्वर लगायत क्षेत्रमा तोडफोड र आगजनी भएको थियो ।

महानगरले वातावरण तथा प्राकृतिक स्रोत संरक्षण ऐन २०७७ र काठमाडौँ महानगरपालिकाको आर्थिक ऐन बमोमिज जरिवाना गराएको जनाएको छ।

यस अगाडी काठमाडौँ महानगरपालिकाले नेकपा एमालेले आयोजना गरेको कार्यक्रममा फोहरमैला गरेको भन्दै एक लाख र राप्रपाले केहि दिन अगाडी गरेको कार्यक्रमका कारण महानगर क्षेत्रमा फोहरमैला र प्रदुषण भएको भन्दै एक लाख जरिबाना तोकेको थियो ।

यसपटक पूर्व राजाको समर्थनमा दुर्गा प्रसाईं नेतृत्वको समुहले कार्यक्रम आयोजना गरेको र उक्त कार्यक्रमलाई राप्रपा र राजसंस्था पुनस्थापना गर्न गठित अभियानका संयोजक नबराज सुबेदी समेतको समर्थन रहेको सार्बजनिक भएपनि काठमाडौँ महानगरपालिकाले ज्ञानेन्द्र शाहको नाममा नै करिब आठ लाख रुपैया जरिवाना तोकेर पत्र पठाउनुलाई कतिपयले अनौठो मानेका छन।

कुन शीर्षकमा कति जरिवाना ?

• कोटेश्वरको सडक तथा सडकपेटीमा जथाभावी फोहोर – रु १ लाख
• महादेवस्थानको सडक तथा सडकपेटीमा जथाभावी फोहोर- रु १ लाख
• तीनकुनेको सडक तथा सडकपेटीमा जथाभावी फोहोर- रु १ लाख
• जडीबुटीको सडक तथा सडकपेटीमा जथाभावी फोहोर- रु १ लाख
• बालकुमारीको सडक तथा सडकपेटीमा जथाभावी फोहोर- रु १ लाख
• सिनामंगलको सडक तथा सडकपेटीमा जथाभावी फोहोर- रु १ लाख
• दमकल तोडफोड- रु १ लाख ३० हजार
• तीनकुनेमा रुख, बिरुवा, रेलिङ तोडफोड- रु ६३ हजार