पोखरा, काठमाडौँमा शुक्रबार भएको आन्दोलनले हिंसात्मक रुप लिएपछि दुईजनाको मृत्यु भएको रअन्य केहि घाइते हुनुको साथै तोडफोड र आगजनी हुनुमा पूर्वराजा ज्ञानेन्द्र शाह समेत जिम्मेवार रहेको भन्दै सरकारले उनीमाथि छानबिन गर्ने भएको छ।  यसक्रममा पूर्व राजा शाह नेपाल बाहिर जानसक्ने अबस्थालाई मध्यनजर गर्दै उनको राहदानी रद्द गर्ने प्रक्रियाअगाडी बढाइएको छ । शुक्रवारको हिंसात्मक आन्दोलनको निर्देशन उनैबाट भएकोले छानविन थालिएपछि विदेश भाग्ने आशंकामा राहदानी रद्द गर्ने प्रक्रिया अघि बढेको हो।

शुक्रबारको हत्या, आगजनी र लुटपाटको फिल्ड कमाण्डर दुर्गा प्रसाई भएपनि उनलाई अघिल्लो दिन बोलाएर निर्देशन दिने तथा आर्थिक स्रोत जुटाउने व्यक्ति ज्ञानेन्द्र शाह हुन् भन्ने पुष्टि भइसकेको सरकार सम्बद्ध स्रोतले जनाएको छ। आगजनीमा परेर एक पत्रकार मारिएका छन्। अर्का एक जनाको गोली लागेर निधन भएको हो। धेरै घरमा तोडफोड र आगजनी गरिएको छ भने भाटभटेनीमा लुटपाट मच्चाइएको थियो।

सोहि घटनालाई लिएर आन्दोलन हिंसात्मक बनाउन उक्साएको आरोपमा प्रहरीले राप्रपाका उपाध्यक्ष रवीन्द्र मिश्र, महामन्त्री धवलशमशेर राणा, स्वागत नेपाल, सेफर्ड लिम्बु, सन्तोष तामाङ र आफूलाई धर्मगुरु बताउने पुष्कर खतिवडालाई पक्राउ गरिसकेको छ ।  आन्दोलनको कमाण्डरको जिम्मेवारी पाएका दुर्गा प्रसाईं भने फरार रहेका छन् । पूर्वराजा ज्ञानेन्द्रले तोकिदिएका आन्दोलनका संयोजक नवराज सुवेदीलाई घरमा नजरबन्दमा राखिएको छ। ८७ वर्षे सुवेदीलाई पक्रेर प्रहरी हिरासतमा राख्दा उनको ज्यानको जोखिमलाई ध्यानमा राखेर प्रहरीले घरभित्रै थुनेको हो।

आगजनी, तोडफोड, ज्युँदै मान्छे जलाउने र लुटपाटमा संलग्न भएको आरोपमा प्रक्राउ गरेको उल्लिखित नेताहरु सहित १ सय ५ जना प्रदर्शनकारीहरूको ‘स्क्रिनिङ’ सुरु गरिएको प्रहरीले जनाएको छ । प्रदर्शनमा क्रममा भएको आगजनी, तोडफोड, लुटपाटलगायतमा उनीहरूको संलग्नता यकिन गर्ने काम प्रहरीले गरिरहेको हो ।उनीहरुमाथि संगठित अपराध, चौरी डकैती, हत्या, आगजनीको अभियोग लगाउने प्रहरीको तयारी छ।

पूर्वराजा ज्ञानेन्द्र शाहका समर्थकहरूले तीनकुने क्षेत्रमा गरेको आन्दोलनका क्रममा एकजना पत्रकारसहित दुई जना मारिएका र नेपाल प्रहरीतर्फ ५३ जना र सशस्त्र प्रहरीतर्फ २२ जना गरी कूल ७५ जना सुरक्षाकर्मीहरु सहित ठुलो संख्यामा अन्य सर्बसाधारण घाइते भएका छन् ।

प्रदर्शनकारीले तीनकुनेको अन्नपूर्ण कम्प्लेक्स, मार्बल हाउस, प्रहरी प्रभाग कोटेश्वर, एकीकृत समाजवादीको कार्यालयमा तोडफोड गर्नुका साथै कोटेश्वरस्थित भाटभटेनीमा लुटपाटसमेत गरेका थिए । उनीहरूले १४ स्थानमा आगजनी, ९ वटा संस्था र कार्यालयमा तोडफोड र १ स्थानमा लुटपाट मच्चाएका थिए ।  उनीहरूले ९ वटा सरकारी सवारी साधन र ६ वटा निजी सवारी साधनमासमेत क्षति पुर्‍याएका थिए ।