पोखरा, भुटानको ड्रुक एयर जहाजले पोखरामा विमानस्थलमा पहिलो व्यावसायिक अन्तर्राष्ट्रिय चार्टड उडान गरेको छ ।
भुटानको पारो विमानस्थलबाट शनिबार विहान ५ः५५ बजे उडेको उक्त जहाज पोखरा अन्तर्राष्ट्रिय विमानस्थलमा बिहान ६ः४० मा अवतरित भएको थियो । सोही जहाज पोखरा विमानस्थलबाट जहाज ४२ अमेरिकी पर्यटक बोकेर ८ः१५ मा भुटानको थिम्पु फर्किएको थियो । जहाजको क्षमता १५० सिट भए पनि उक्त जहाजमा जम्मा ३ जना यात्रु आएको पोखरा विमानस्थल प्रमुख देवेन्द्रलाल कर्णले जानकारी दिए ।
भुटानबाट पोखरा आएका पर्यटकलाई पोखरा पर्यटन परिषदले विमानस्थलमा स्वागत पनि गरेको थियो । पोखरा महानगरका मेयर धनराज आचार्यले पोखराबाट नियमित अन्तर्राष्ट्रिय उडान गर्न विभिन्न देशसँग कुटनीतिक पहल सो अवसरमा बताए ।
यो भन्दा पहिला पोखरा विमानस्थलमा चीनको सिचुवान एयरलाइन्सको जहाज छेङ्दुबाट चार्टर्ड उडान गरी यो विमानस्थलमा अवतरित भएको थियो । संस्कृति, पर्यटन तथा नागरिक उड्डयन मन्त्री सुदन किराँतीले पोखरा अन्तर्राष्ट्रिय विमानस्थलबाट व्यावसायिक उडान शुरु भएकोमा खुसि प्रकट गरेका छन् ।
नेपाल प्रेस तस्वीर
