पोखरा, आफ्ना बाबु भानुभक्त पहारीको स्मृतिमा पोखरा ६ बैदामका हेमराज पहारी परिवारबाट केदारेश्वर आश्रम संचालनको लागि आर्थिक सहयोग प्रदान गरिएको छ । केदारेश्वर महादेवमणी सेवाश्रम समितिका संस्थापक उपाध्यक्ष समेत रहेका स्व.भानुभक्त पहारीको स्मृतिमा आफ्नो जन्मदिनको अवसरमा हेमराज पहारी परिवारबाट १ लाख ५० हजार रुपैया आर्थिक सहयोग हस्तान्तरण गरिएको पहारी परिवारले जनाएको छ ।

केदारेश्वर महादेवमणी सेवाश्रम समितिका स्वामि डा.लेखनाथ आचार्य( चिद्धन चैतन्य) लाई पहारी परिवारले उक्त रकम हस्तान्तरण गरेको हो । आफ्नो बाबुको स्मृतिमा आफ्नो जन्म दिनको अवसर पारेर केदारेश्वरमा सानो रकमको अक्षयकोष स्थापना गरिएको हेमराजले बताए । साथै पहारी परिवारले आश्रममा रहेका बिद्यार्थी तथा अन्य सहभागिहरुलाई दिवा खाना सहितको दक्षिणा समेत प्रदान गरेको उनले सुनाए ।

स्व.भानुभक्तकी धर्मपत्नी पूर्णकुमारी पहारी, छोराहरु हेमराज, शिवराज, छोरी-ज्वाई तिला बराल-ठाकुर बराल, बुहारी उर्मिला पहारी, साबित्री पहारी लगायतको कार्यक्रममा सहभागिता रहेको थियो । कार्यक्रममा बोल्दै स्वामि डा.आचार्यले विभिन्न सहयोगी दाताहरुको सहयोग र मन्दिरमा प्राप्त दानबाटै आश्रम संचालन हँुदै आएको बताए । जन्म दीनमा यसरी आफ्ना बाबुको स्मृतिमा पुण्य काम गर्नु समाजको प्रशंसनीय कार्य भएको उनको भनाई थियो ।

यसैबिच, पहारी परिवारले गुल्मीको श्रीराम मन्दिर रुद्रवेणीमा रहेको बृद्धाआश्रममा समेत आज(आइतबार) विहानको खानाको व्यबस्था गरेको हो । उक्त आश्रममा हाल ३२ जना बृद्धाहरु हुनु हुन्छ । बाबुको प्रेरणाबाट आफुहरुले पनि विभिन्न सामाजिक कार्य गर्दै आएको हेमराजले जनाउनु भयो । बाबु भानुभक्तको निधन भएको तिथी र जेठो छोरा हेमराजको जन्म दिन आज एकै दिन परेको हो ।