पोखरा, पृथ्वीराजमार्ग अन्तर्गत तनहुँको शुक्लागण्डकी नगरपालिका–५ गाछेपानीमा शनिबार दिउँसो भएको सवारी दुर्घटनामा गाडीको ठक्करबाट दुई जनाको मृत्यु भएको छ ।

पोखराबाट काठमाडौंतर्फ जाँदै गरेको बा ११ च ७३६५ नम्बरको टोयोटा पिकअप गाडीले डिभाइडर नाघेर बिपरित दिशाबाट आफ्नै लेनमा आउंदै गरेको ग १९ प २९८८ नम्बरको स्कुटरलाई ठक्कर दिँदा स्कुटरमा सवार दुई जनाको मृत्यु भएको जिल्ला प्रहरी कार्यालय तनहुँले जनाएको छ ।

जिल्ला प्रहरी कार्यालय तनहुँका प्रहरी निरीक्षक अमृत लामिछानेका अनुसार गाडीको ठक्करबाट घाइतेमध्ये एक जनाको  अर्को एक जनाको तनहुँ सेवा अस्पताल दुलेगौंडामा उपचारका क्रममा मृत्यु भएको हो ।

मृत्यु हुनेमा स्कुटर चालक पाँचथर घर भई हाल तनहुँको गाछेपानीस्थित श्री मुक्तिनाथ शुक्लागण्डकी च्यवनधाममा पुजारीको रुपमा कार्यरत ३० वर्षिय गणेश खतिवडा र गाछेपानी निवासी स्कुटरको पछाडी सवार ५५ वर्षिय कृष्ण बहादुर भुजेल रहेका छन् । खतिवडा विगत ४ वर्षदेखि च्यवनधाममा पुजारीको रुपमा कार्यरत थिए ।

खतिवडाको तनहुँ सेवा हस्पिटलमा उपचारको क्रममा मृत्यु भएको इलाका प्रहरी कार्यालय बेलचौताराका प्रमुख प्रहरी निरिक्षक धननारायण श्रेष्ठले जानकारी दिए । भुजेलको पोखरास्थित गण्डकी मेडिकल कलेजमा र उपचारको क्रममा मृत्यु भएको प्रहरीले जनाएको छ ।

प्रहरीका अनुसार गाडी र गाडी चालक ललितपुरका ६३ वर्षिय कृष्ण बहादुर श्रेष्ठ प्रहरीको नियन्त्रणमा छन् । सीसीटीभी फुटेजमा देखिए अनुसार विपरित लेनमा आएर स्कुटरलाई ठक्कर दिएको हो । यसबारे थप अनुसन्धान भइरहेको प्रहरीले जनाएको छ ।