पोखरा, राष्ट्रिय स्वतन्त्र पार्टीको संसदीय दलको बैठकले पार्टीका वरिष्ठ नेता बालेन्द्र शाहलाई संसदीय दलको नेता बनाउने निर्णय गरेको छ । यो निर्णयसँगै बालेन्द्र शाहलाई प्रधानमन्त्री नियुक्ति गर्न मार्ग खुलेको छ । उनलाई संसदीय दलको नेता चयन गर्ने प्रस्ताव पार्टी सभापति रवि लामिछानेले गरेका थिए ।
‘नेपालको संविधान २०७२ को धारा ७६को उपधारा १ मा राष्ट्रपतिले प्रतिनिधिसभामा बहुमत प्राप्त दलको संसदीय दलको नेतालाई प्रधानमन्त्री नियुक्त गर्नेछ’ भन्ने उल्लेख भएकोले बालेन्द्र शाहलाई प्रधानमन्त्री नियुक्त गरि उनकै नेतृत्वमा मन्त्रिपरिषद् गठन हुने भएको हो ।
गत फागुन २१ गते भएको प्रतिनिधिसभाको निर्वाचनमा रास्वपाले करिब दुई तिहाइ सिट जितेर संसदमा पहिलो दल बनेको थियो । रास्वपासँग सहज बहुमत भएकाले राष्ट्रपतिले उनलाई धारा ७६ को उपधारा १ अनुसार प्रधानमन्त्री नियुक्त गर्ने र भोलि शुक्रबार नै शपथ खुवाउने कार्यसूची तय भएको छ ।
