पोखरा, पोखराको लेकसाइडबाट पामेतर्फ जाने सडकको गैराकोचौतारा नजिक एउटा कार सडकबाट फेवातालमा खस्दा एक युवकको मृत्यु भएको छ। शनिबार (आज ) बिहान करिब सबा दुई बजेको समयमा बिएए १५८२ नम्बरको कार सडकबाट फेवातालमा खस्दा कार चालक २४ बर्षीय अदित गुरुंगको मृत्यु भएको शसस्त्र प्रहरी बल कालिका गणले जनाएको छ।

फेवातालमा कार खसेको घटनाको जानकारी भएलगत्तै सशस्त्र प्रहरी बल नेपाल नं. २४ गणको हेडक्वार्टर मालेपाटन स्थित कालिका गणबाट  प्रहरी उपरिक्षक बसन्त बहादुर सिंहको कमाण्डमा २१ जनाको उद्द्वार टोली खटिएको थियो।

गोताखोर सहितको टोलीले कार चालक युवालाई तालबाट बाहिर निकालेर उपचारको लागि पृथ्वीचोकस्थित गण्डकी मेडिकल कलेज पठाएकोमा बिहान साढे चारबजे डाक्टरले मृत घोषणा गरेका थिए।  मृतक युवा स्याङ्जाको फेदीखोला गाउँपालिका–५ घर भई हाल पोखरा–७ मासबार बस्ने २४ वर्षीय अदित गुरुङ रहेका छन्।

डुबेको कारलाई क्रेनको सहायताले तालबाट बाहिर निकालिएको छ। घटनाबारे थप अनुसन्धान शुरु गरिएको प्रहरीले जनाएको छ तालमा खसेको कारलाई क्रेनको सहायताले तालबाट बाहिर निकालेर वडा प्रहरी कार्यालय बैदाममा राखिएको बुझिएको छ।