पोखरा, मुक्तिनाथ विकास बैंक लिमिटेडले आफ्ना भौतिक रुपमा नजिक रहेका केहि शाखाहरुलाई मर्ज गर्ने र आबश्यकता परेको ठाउँमा शाखा विस्तार गर्ने योजनालाई निरन्तरता दिएको छ यसक्रममा बैंकले आफ्ना दुईवटा शाखा कार्यालयहरुलाई नजिकैका अन्य शाखामा मर्ज गर्ने निर्णय गरेको छ ।
बैंकले कास्कीको पोखरा र पर्साको वीरगन्जमा रहेका शाखा कार्यालयहरुलाई २०८३ जेठ १ गतेदेखि लागू हुने गरी एक आपसमा गाभेर एकीकृत कारोबार सुरु गर्न लागेको हो । गण्डकी प्रदेशको पोखरा महानगरपालिका वडा नम्बर ९ मा रहेको महेन्द्रपुल शाखालाई सोही वडाकै चिप्लेढुंगा शाखामा समायोजन गरिने बैंकले जनाएको छ । यी दुई शाखाको दूरी करिब ५ सय मिटर मात्रै छ ।
यस्तै बैंकले दिएको जानकारी अनुसार मधेश प्रदेश अन्तर्गत वीरगन्ज महानगरपालिका वडा नम्बर ८ मा रहेको वीरगन्ज शाखालाई वडा नम्बर ६ मा रहेको आदर्शनगर शाखामा गाभिनेछ । यी दुई शाखा बीचको दूरी करिब ८ सय मिटर रहेको छ ।
नेपाल राष्ट्र बैंकले ’क’, ’ख’ र ’ग’ वर्गका इजाजतप्राप्त संस्थाहरुका लागि जारी गरेको परिपत्र बमोजिम बैंकले शाखा कार्यालयहरु गाभ्ने प्रक्रिया अघि बढाएको हो । यसरी शाखा गाभिएपछि ती स्थानका ग्राहकले अब आदर्शनगर र चिप्लेढुंगा शाखाबाट बैंकिङ कारोबार गर्नुपर्नेछ ।
शाखा समायोजन भए पनि ग्राहकले पाउने सेवामा कुनै असर नपर्ने बैंकले स्पष्ट पारेको छ । ‘गाभिने शाखा कार्यालयहरुबाट बैंकिङ कारोबार गरिरहेका ग्राहकले शाखा गाभिएपछि पनि गाभ्ने शाखाबाट पूर्ववत् रुपमा आफ्नो कारोबारलाई सुचारु गर्न सक्छन्’, बैंकले भनेको छ । बैंकले यस प्रक्रियाबाट ग्राहक र सरोकारवालामा पर्न जाने असुविधाप्रति क्षमायाचना समेत गरेको छ ।
