पर्थ (अष्ट्रेलिया), अस्ट्रेलियाको पर्थमा एउटा अनियन्त्रित कार घरभित्र छिर्दा घरभित्र सुतिरहेकी ५३ वर्षीया नेपाली महिला विष्णुकुमारी गुरुङको ज्यान गएको छ। शुक्रबार राति भएको यस दुःखद दुर्घटनामा नेपालबाट घुम्न आएकी गुरुङको घटनास्थलमै मृत्यु भएको हो। उनी छोरी र ज्वाइँलाई भेट्न नेपालबाट तिन दिन अगाडी मात्र अस्ट्रेलिया पुगेकी थिइन्।
मृतक विष्णुकुमारी गुरुङको परिवार यतिखेर गहिरो शोकमा डुबेको छ। आफ्नी आमा गुमाउनु परेको पीडा व्यक्त गर्दै छोरी निशा गुरुङले आइतबार सञ्चारमाध्यमसँग भनिन्, ‘हामी अहिले निकै गहिरो शोकमा छौँ।’ विष्णुकुमारी दुर्घटना भएको समयमा घरको अघिल्लो भागमा रहेको कोठामा सुतेकी थिइन्। तीव्र गतिको कारले घरको पर्खाल फोरेर भित्र पसेपछि उनलाई ठक्कर दिएको थियो।
अस्ट्रेलियाली सञ्चारमाध्यमका अनुसार प्रहरीले दुर्घटना गराउने कार चालकलाई पक्राउ गरिसकेको छ। पक्राउ पर्नेमा केउडेल निवासी ३६ वर्षीय राइस हकिन्स छन्। प्रहरीले उनलाई शनिबार नै नियन्त्रणमा लिएको हो। अनियन्त्रित कारले घरमा ठूलो क्षति पुर्याए पनि चालक हकिन्सलाई भने कुनै चोटपटक नलागेको प्रहरीले जनाएको छ।
विष्णुकुमारीकी छोरीले आफ्नो पीडा पोख्दै यो ‘नराम्रो सपना’ लाई बयान गर्ने ‘कुनै शब्द’ नभएको बताएकी छिन् । साथीभाइ र परिवारमा हिमाली भनेर चिनिने ५३ वर्षीया विष्णु कुमारी गुरुङको शुक्रबार राति करिब ११:४० बजे मृत्यु भएको थियो । राइस रोबर्ट हकिन्सले चलाएको पहेँलो रङको फोर्ड फाल्कन गाडी अनियन्त्रित भई सडकबाट बाहिरिएर रिभरभेलको अलेक्जेन्डर रोडमा रहेको उनकी छोरीको भाडाको घरमा ठोक्किँदा उनको घटनास्थलमै ज्यान गएको थियो ।
वेस्ट अस्ट्रेलियन पत्रिकाका अनुसार घटना हुँदा उनी भुइँमा सुतिरहेकी थिइन् । हकिन्सलाई कर्तव्य ज्यान र सम्पत्ति विनाश वा नोक्सानीको अभियोग लगाइएको छ र उनी हाल हिरासतमा छन् । मृतककी छोरी निशा गुरुङका अनुसार उनकी आमा परिवार र ४ वर्षीय नातिसँग समय बिताउन नेपालबाट भर्खरै मंगलबार मात्र पर्थ आइपुगेकी थिइन् ।
उनले आफ्नो परिवार ‘टुटेको’ र यस वियोगले कहिल्यै ‘पुरिन नसक्ने’ खाडल बनाएको बताइन् । ‘आफ्नो भावना व्यक्त गर्ने मसँग कुनै शब्द छैन, यो सबै मेरो मुटुभित्र छ’, उनले आइतबार भनिन् । ‘(आमा) धेरै खुसी र रमाइलो स्वभावको हुनुहुन्थ्यो … उनी गत मंगलबार मात्र यहाँ आएकी थिइन्, त्यसैले यो हाम्रो परिवारका लागि एउटा विपत्ति हो ।’
‘मेरो दिमागले केही सोच्नै सकेको छैन, मलाई अझै पनि यो एउटा नराम्रो सपना जस्तो लागिरहेको छ ।’ निशाले आफ्नी आमाको सम्झना र सम्मान कायम राखियोस् भन्ने चाहना व्यक्त गर्दै न्यायको माग गरिन् । ‘यस देशमा सधैँ राम्रो न्याय पाइन्छ, मलाई आशा छ मेरो आमाको हकमा पनि त्यस्तै हुनेछ’, उनले भनिन् । गुरुङकी भतिजी सुमिता गुरुङले आफ्नी सानीआमा सधैँ खुसीको स्रोत भएको बताउँदै उनको मृत्युलाई ‘त्रासदी’ को संज्ञा दिइन्
‘हामीलाई थाहा छ यो घटना निकै दुःखद र भयानक छ, हामीलाई धेरै कुरा याद छैन, तर जब हामी उहाँको बारेमा सोच्छौँ, हाम्रो अनुहारमा मुस्कान आउँछ’, उनले भनिन् । ‘उहाँ जहाँ गए पनि त्यो ठाउँ नै उज्यालो बनाउनुहुन्थ्यो ।’ ‘उहाँ हाम्रो साथमा हुँदा कहिल्यै उदास हुनुपर्दैनथ्यो … सानो खुसीलाई पनि उहाँको साथले ठूलो उत्सवमा बदल्थ्यो ।’
गुरुङको परिवारले अहिले यात्रा र अन्त्येष्टिको खर्चमा सहयोग पुऱ्याउन गोफन्डमी सुरु गरेका छन् । सुमिताले परिवारले गुरुङका छोरा र बुहारीलाई पर्थ ल्याउने प्रबन्ध मिलाइरहेको बताइन् । ‘हामीले यस्तो घटना होला भनेर कहिल्यै सोचेका थिएनौँ … र हामी आर्थिक रूपमा तयार पनि थिएनौँ’, उनले भनिन् । ‘हामीले उहाँको छोरालाई (पर्थ) ल्याउनु पर्नेछ, किनकि हाम्रो हिन्दु संस्कृति र धर्मअनुसार छोराले नै आमा वा बुबाको अन्तिम बिदाइ (दाहसंस्कार) गर्नुपर्ने हुन्छ ।’
‘हामीले उनलाई ल्याउनै पर्छ, तर उनी अहिले मानसिक रूपमा स्थिर छैनन्, त्यसैले सहयोगका लागि उनकी श्रीमतीलाई पनि साथै ल्याउनु पर्नेछ । हामीले छोरा र बुहारीका लागि दुवैतर्फको हवाई टिकटसहित आकस्मिक भिसाको प्रक्रिया मिलाउनुपर्नेछ, साथै यहाँ उनको दाहसंस्कार गर्नुपर्नेछ … त्यसपछि पूरै परिवार घर गएर आफ्नो पारिवारिक संस्कारहरू पूरा गर्न चाहन्छ, त्यसैले सबै कुरा निकै महँगो हुनेछ । त्यसका साथै तपाईं देख्न सक्नुहुन्छ घरको अवस्था कस्तो भएको छ, त्यसैले हामीले तुरुन्तै अर्को ठाउँमा सर्नुपर्नेछ र (निशा) ले आफ्नो काम र सबै कुरा छोड्नुपर्ने अवस्था छ ।’
आइतबार बिहान अलेक्जेन्डर रोडको त्यो घर सुनसान थियो, ढोका अगाडि राखिएको एउटा फूलको गुच्छाले मात्रै त्यस त्रासदीको सम्झना गराइरहेको थियो । त्यहाँ कुनै प्रहरी त थिएनन्, तर कालो कपडाले छोपिएको धातुको बार र रातो तथा पहेँलो डिएफइएस टेपले भत्किएको भित्ता र भग्नावशेषलाई घेरेको थियो । गाडी ठोक्किएको ठाउँलाई एउटा प्लाइवुडले छोपिएको थियो । छिमेकीको घर र यो घरको बीचमा रहेको बारमा पनि खतराको संकेत गर्ने टेप टाँसिएको थियो, जहाँबाट गाडी भित्र छिरेको देखिन्थ्यो ।
नेप्लिज एसोसिएसन अफ वेस्टर्न अस्ट्रेलियाका अध्यक्ष नवीन भण्डारीले यस त्रासदीले वेस्ट अस्ट्रेलियामा रहेको नेपाली समुदायलाई स्तब्ध बनाएको बताए । ‘जे भयो त्यसले हामीलाई साँच्चै दुःखी तुल्याएको छ, यसलाई शब्दमा व्यक्त गर्न गाह्रो छ’, उनले भने । ‘यो साँच्चै नै धेरै दुःखद खबर हो … उहाँ निकै फूर्तिलो र खुसी रहने महिला हुनुहुन्थ्यो ।’ ‘यो एउटा दुःखद क्षति हो र एउटा समुदायको रूपमा हामी शोकमा छौँ र परिवारलाई हरसम्भव तरिकाले सहयोग गर्नेछौँ ।’
आरोपित चालक, क्युडेलका ३६ वर्षीय पुरुष र उनका ४३ वर्षीय यात्रीलाई भने कुनै चोट लागेको छैन । चालकलाई घटनास्थलमै पक्राउ गरिएको थियो र उनलाई ज्यान मुद्दा र सम्पत्ति विनाश वा नोक्सानीको अभियोग लगाइएको छ । उनलाई धरौटीमा छोड्न अस्वीकार गरिएको छ र उनी आइतबार पर्थ म्याजिस्ट्रेट अदालतमा उपस्थित हुने कार्यक्रम छ । मेजर क्र्यास इन्भेस्टिगेसनका अधिकारीहरूले दुर्घटना हुनुअघिका क्षणहरूको अनुसन्धान जारी राखेका छन् ।
गुरुङ आफ्नो श्रीमानका साथ परिवारलाई भेट्न केही महिनाअघि मात्रै अस्ट्रेलिया आइपुगेकी थिइन् । शनिबार आफन्तहरू भत्किएको घर बाहिर जम्मा भएका थिए र यो अकस्मात भएको क्षतिलाई आत्मसात् गर्न संघर्ष गरिरहेका थिए ।
(द अस्ट्रेलियन टुडेको अनलाइन संस्करणबाट)
