पोखरा, नेपाल भूतपूर्व खेलाडी मंचले प्रत्येक बर्ष गर्दै आएको २० औँ संस्करणको सफल पोखरा अन्तर्राष्ट्रिय म्याराथन यस बर्ष आगामी फागुन २ गते हुने भएको छ। पोखरा रंगशालाबाट सुरु हुने यो म्याराथन यसपटक नयाँ रुटमा दौडिँदै बाराहीघाट चोकमा पुगेर समापन हुने आयोजकले जनाएका छन्। यस म्याराथनमा पहिलो पटक ‘म्याराथन नेपाल’ विधा समावेश गरिएको छ भने गण्डकी प्रदेशका खेलाडीलाई प्रोत्साहन गर्न ‘गण्डकी उत्कृष्ट’ विधाको समेत व्यवस्था गरिएको छ।यस पटक पुरस्कारको राशिमा वृद्धि गरेर म्याराथनमा पहिलो हुने धावकले ४ लाख रुपैयाँ पुर्याइएको छ। त्यसैगरी दोस्रो हुनेले २ लाख, तेस्रोले १ लाख र चौथो हुनेले ५० हजार रुपैयाँ प्राप्त गर्नेछन्।

प्रतियोगितामा मुख्य म्याराथनसँगै महिला तथा पुरुष हाफ म्याराथन, १० किलोमिटर दौड, ५ किलोमिटर छात्र–छात्रा दौड, ४५ वर्षमाथिको भेट्रान दौड, ह्विल चियर र दृष्टिविहीनतर्फका प्रतिस्पर्धाहरू समेत समावेश गरिएका छन्। यी सबै विधाहरूमा आकर्षक पुरस्कारको व्यवस्था गरिएको आयोजकले जनाएका छन्। सुजल डेरी प्रालीको ‘सफल दूध’ मुख्य प्रायोजक रहेको यस प्रतियोगिता ‘स्वास्थ्यका लागि, पोखराका लागि’ भन्ने नाराका साथ आयोजना गरिंदै आएको छ।

मुख्य प्रायोजक सुजल डेरीले खेलकुद र स्वास्थ्यको सम्बन्धलाई मजबुत बनाउन लामो समयदेखि सहकार्य गर्दै आएको जनाएको छ। उपभोक्ताको पौष्टिकता र सहजतालाई ध्यानमा राखेर दुग्धजन्य पदार्थ उत्पादन गर्दै आएको सफल दूधले पछिल्लो एक दशकदेखि खेलकुद क्षेत्रमा निरन्तर सहयोग पुर्‍याउँदै आएको छ। पोखराको गरिमालाई अन्तर्राष्ट्रिय स्तरमा चिनाउन यो म्याराथनले महत्त्वपूर्ण भूमिका खेल्ने कम्पनीको विश्वास छ। मोफसलमा हुने सबैभन्दा ठूलो म्याराथनका रूपमा स्थापित यस कार्यक्रमले पोखरालाई खेलकुद पर्यटनको केन्द्र बनाउन मद्दत पुर्‍याएको छ।