सिड्नी, अस्ट्रेलियाको न्यू साउथ वेल्स राज्यको सिड्नीस्थित बन्डी बिचमा भएको गोलीबारीको घटनामा एक आक्रमणकारी सहित १५ जनाको मृत्यु भएको समाचार छ।  उक्त घटनामा ४० जना जति घाइते भएको अनुमान गरिएको भएपनि न्यु साउथ वेल्स प्रहरीका अनुसार गोलीकाण्डमा एक १० वर्षीया बालिकासहित १५ जना मारिएका छन्। मृतकहरूको उमेर १० वर्षदेखि ८७ वर्षसम्म रहेको प्रहरीले बताएको छ।

प्रधानमन्त्री एन्थोनी अल्बानीजले बन्डीको दृश्यलाई स्तब्ध पार्ने र पीडादायी भनी चित्रण गरेका छन् ।बिबिसीसंग कुरा गर्दै एक प्रत्यक्षदर्शीले गोलीबारी सुरु हुँदा उनी बिचमा भइरहेको हनुकाह कार्यक्रमबाट आफ्ना बच्चाहरूसँगै भागिरहेका बताए । प्रहरीले घटनाको सम्बन्ध हनुकाह कार्यक्रमसँग छ/छैन भन्नेबारे अझै अज्ञात रहेको बताएको छ ।

हनुका पर्वको सुरुवातको उपलक्ष्यमा एक कार्यक्रम चलिरहेको बेला यो आक्रमण भएको थियो। प्रहरीले घटनालाई आतङ्कवादी हमलाको रूपमा लिएर अनुसन्धान गरिरहेको छ।

प्रहरी कमिश्नर माल ल्यायनले आक्रमणमा संलग्न दुई बन्दुकधारी ५० वर्षीय बाबु र उनका २४ वर्षीय छोरा रहेको जानकारी दिएका छन्। प्रहरीको गोली लागेर वृद्ध बन्दुकधारीको घटनास्थलमै मृत्यु भएको छ भने २४ वर्षीय छोराको अवस्था चिन्ताजनक रहेको छ। घटनास्थलमा पुगेका केही प्रहरी अधिकारीहरू पनि छन्। घाइते सबैलाई उपचारका लागि अस्पताल लगिएको छ।

प्रहरीका अनुसार ५० वर्षीय बन्दुकधारीसँग वैध हतियार इजाजतपत्र थियो र उनका नाममा छवटा हतियार दर्ता थिए। आक्रमणस्थल बन्डी बिचमा छवटा हतियार फेला परेको प्रहरीले जनाएको छ। घटनास्थलमा ‘दुईवटा सक्रिय सुधारिएका विस्फोटक उपकरणहरू’ पनि भेटिएका थिए, जसलाई प्रहरीले निष्क्रिय पारिसकेको छ।

प्रहरी अधिकारीहरूले रातभरि पश्चिमी सिड्नीका क्याम्प्सी र बोनीरिग उपनगरका दुई सम्पत्तिमा छापा मारेका छन्। सिड्नीको यहुदी समुदायलाई थप सुरक्षा र सहयोग प्रदान गर्न ३२८ अधिकारी परिचालन गरिएको प्रहरीले बताएको छ।

प्रधानमन्त्री एन्थोनी अल्बानीजले यस आक्रमणलाई ‘दुष्टताको कार्य’ र ‘सचेतरुपमा यहुदी समुदायलाई लक्षित गरिएको’ बताएका छन्।