पोखरा, पटक पटक स्थगित हुँदै आएको दशौँ राष्ट्रिय खेलकुद आगामी फागुन पहिलो साता गरिने भएको छ । राष्ट्रिय खेलकुद परिषद् (राखेप)का अध्यक्ष युवा तथा खेलकुदमन्त्री बब्लु गुप्ताको अध्यक्षतामा बुधबार (कात्तिक १९)  बसेको १२३औँ बोर्ड बैठकले दशौँ राष्ट्रिय खेलकुद फागुन १ देखि ७ गतेसम्म गर्ने निर्णय गरेको छ ।

कर्णाली प्रदेशमा उक्त प्रतियोगिता गर्ने निर्णय गरेको बैठकले नेपाललाई पहिलो अन्तर्राष्ट्रिय पदक दिलाउने पूर्वधावक जितबहादुर केसीलाई २५ लाख नगद पुरस्कार दिन मन्त्रिपरिषद्‌मा सिफारिस गर्ने निर्णय गरेको छ ।

त्यस्तै, लामो समयदेखि राष्ट्रिय प्रतियोगिता नगर्ने खेल संघलाई तीन महिनाभित्र प्रतियोगिता गर्न निर्देशन दिने, राष्ट्रिय खेल संघ आफैँले घोषणा गरेको खेलाडीको सुविधा र पुरस्कार १५ दिनभित्र सम्बन्धित खेलाडीलाई उपलब्ध गराउन निर्देशन दिने, खेल संघले वैदेशिक भ्रमणसम्बन्धी प्रतिवेदन राखेपमा पेस गर्न निर्देशन दिने लगायतको निर्णय गरेको छ ।

राखेपका सदस्य–सचिव टंकलाल घिसिङले सहजीकरण गरेको बैठकमा राखेपका उपाध्यक्ष ध्रुव आचार्य, खेलकुद मन्त्रालयका सचिव डा. हरिप्रसाद लम्साल, बोर्ड सदस्य लगायतको उपस्थिति रहेको थियो ।