पोखरा, पोखरामा प्रधान कार्यालय स्थापना गरेर शुरु भएको माछापुच्छ्रे बैंकबाट केहि संस्थापक सेयरधनी बाहिरिएका छन भने केही नयाँ शेयरधनीहरुलाई प्रवेश गराइएको छ । संस्थापक शेयरधनीको रुपमा रहेको पोखराको लक्ष्मी ग्रुप र गैर आवाशीय नेपाली संघका संस्थापक अध्यक्ष उपेन्द्र महतो बैंकको शेयरधनीबाट बाहिरिएको छन ।

महतोले आफ्नो नाममा रहेको ९,१४ प्रतिशत शेयर र लक्ष्मी ग्रुपका अध्यक्ष गणेशबहादुर श्रेष्ठले पनि आफ्नो नाममा रहेको ०.९१ प्रतिशत शेयर बिक्रि गरेको बुझिएको छ । उनीहरू बाहिरिएसँगै माछापुच्छ्रे बैंकमा सन नेपाल लाइफ इन्स्योरेन्सलाई ०.८६ प्रतिशत शेयर दिएर प्रवेश गराइएको छ ।

नियम अनुसार सञ्चालक समितिका सदस्य र सञ्चालकबाट बाहिरिएको एक वर्षसम्म आफ्नो वा परिवारका सदस्यको नाममा रहेको सेयर बिक्री गर्न नपाइने प्रावधान रहेको छ । बैंकको संचालक रहेका उपेन्द्र महतोले सञ्चालक पदबाट बाहिरिएको एक वर्षपछि आफ्नो नाममा रहेको सेयर समेत भाइहरू वीरेन्द्र महतो र सुरेन्द्र महतोलाई बिक्री गरी बैंकबाट पूर्ण रूपमा बाहिरिएको बुझिएको छ। आर्थिक वर्ष २०८०/८१ सम्म बैंकमा उपेन्द्र महतोको ९.१४ प्रतिशत सेयर हिस्सा रहेकोमा गत आर्थिक वर्ष २०८१/८२ को अन्त्यमा उनको शेयर शून्यमा झरेको छ ।

उपेन्द्र महतोको शेयर सुन्यमा पुगेको भएपनि उनका भाइ सुरेन्द्र महतोको शेयर १.७१ प्रतिशतबाट बढेर ७.७४ प्रतिशत र अर्का भाइ वीरेन्द्रको नाममा रहेको सेयर ०.६१ प्रतिशतबाट बढेर १.५८ प्रतिशत पुगेको छ । आर्थिक वर्ष २०८०/८१ मा सुरेन्द्र महतोको नाममा रहेको सेयर कर्मचारी सञ्चय कोषले खरिद गरी बैंकमा प्रवेश गरेको थियो। कोषले सो समयमा एकैपटक ९.२४ प्रतिशत सेयर खरिद गरेको थियो ।