काठमाडौँ, अन्तरिम सरकारकी प्रधानमन्त्री सुशीला कार्कीले जेनजी आन्दोलनका घाइतेसँग मंगलबार बालुवाटारमा लामो छलफल गरेकी छन । छलफलमा सहभागी भएका आन्दोलनका घाइतेहरूमध्ये अधिकांशले भ्रष्टाचारी र आन्दोलन दमन गर्नेहरूविरूद्ध कठोर ढंगले प्रस्तुत हुन सरकारलाई सुझाव दिएका थिए। सरकारले भ्रष्टाचारीमाथि कारबाही नगर्ने हो भने सडकमा ओर्लिएर अर्को आन्दोलन गर्ने चेतावनी समेत उनीहरुले दिएको श्रोतले जनाएको छ।
आन्दोलनका घाइते रूपिन खड्काको नेतृत्वमा आएको १८ जनाको समूहले ‘क्रान्तिबाट आएको सरकारले क्रान्तिकारी कदम चाल्नुपर्ने’मा जोड दिएको थियो । घाइते हरूका तर्फबाट खड्काले भने, ‘जसका विरूद्ध हामीले आन्दोलन गरेका थियौं, उनीहरूलाई तत्काल पक्राउ गर्न सरकारलाई केले छेकेको छ? नियमले छेक्यो कि कानुन र संविधानले छेक्यो ? जहाँ बाधा छ, त्यहीँबाट फुकाउन सुरू गरौं ।’‘तपाईंहरू चुनाव चुनाव मात्र भनिरहनुभएको छ। के २०८४ को चुनाव २०८२ मा सार्नलाई मात्र यो सरकार आएको हो?’ घाइते प्रतिनिधिहरूले कार्कीलाई प्रश्न गरेका थिए।
अन्तरिम सरकारका गृहमन्त्री ओमप्रकाश अर्याल, ऊर्जामन्त्री कुलमान घिसिङ, शिक्षामन्त्री महावीर पुन र सञ्चारमन्त्री जगदीश खरेल समेत सहभागी भएको उक्त छलफलमा प्रधानमन्त्री कार्कीले आफूहरू जेन-जी आन्दोलनको मर्मभन्दा बाहिर नजाने प्रतिबद्धता व्यक्त गर्दै कानुनी रूपमा तल नपर्ने गरी आन्दोलनको म्यान्डेट अनुसार चल्ने बताइन्।
‘चुनाव पनि हुन्छ, भ्रष्टाचारको अनुसन्धान पनि हुन्छ। राज्यका स्थापित निकायले तीव्र गतिमा भ्रष्टाचारको छानबिन गरिरहेका छन्। आ-आफ्नो ठाउँबाट काम गरिरहेका छन्। तपाईंहरू बोल्न नछाड्नुहोस्। हामीलाई दबाब दिन पनि नछाड्नुहोस्। हेर्नुहोला, अब नतिजा आउँछ। छानबिनमा परेपछि बाहिर कसले के–के बोलिरहेका छन्, सुन्नुभएकै होला,’ उनले भनिन्।
गृहमन्त्री अर्यालले भ्रष्टाचार र आन्दोलनमा भएको दमनबारे छानबिनमा भइरहेको प्रगतिबारे जानकारी दिएका थिए। घाइतेहरूले कतिपय आरोपित व्यक्ति भाग्न खोजेको र अकुत सम्पत्ति लुकाउन खोजेको भनेका थिए। यसको जबाफमा गृहमन्त्री अर्यालले भाग्न खोजेकाहरू र लुकेकाहरू पनि भाग्ने अवस्था नभएपछि ‘नेपालमै छु’ भनेर देखापर्न थालेको बताएका थिए ।
