पोखरा, पोखरा महानगरपालिका वडा नम्बर ५ मा बसोबास गर्ने सर्बसाधारण तथा आमनागरिकहरुको सुरक्षाको बारेमा छलफल गर्न वडास्तरीय सुरक्षा समितिको बैठक शुक्रबार सम्पन्न भएको छ। बैठकमा वडाको विभिन्न क्षेत्रका अग्रज व्यक्तित्व, जनप्रतिनिधि, नागरिक समाजका अगुवा लगायतको सहभागिता रहेको थियो।

वडास्तरीय सुरक्षा समितिका संयोजक राजेन्द्र अधिकारीको अध्यक्षतामा सम्पन्न  बैठकमा वडाको बिभिन्न क्षेत्रका १८ जना बक्ताले आआफ्नो सुझाबसहितको धारणा राखेका थिए। बक्ताहरुले बिभिन्न टोलका समस्या र समग्र सुरक्षाको ब्यबस्थालाई कसरि प्रभावकारी बनाउने भन्ने सम्बन्धमा आआफ्नो सुझाब दिएको बैठकमा सहभागी नेकपा एमालेकी नेतृ एबम स्थानीय वडाबासी अन्जु क्षेत्रीले गुरुकुल खबरलाई जानकारी दिईन । समितिले सुरक्षा निकाय, नागरिक समाज र जनप्रतिनिधिहरुसँग सहकार्य गरी काम गर्ने जनाएको छ ।

चाडपर्वका बेला लुटपाट, चोरी, कालोबजारी जस्ता घटना बढी हुने गरेका छन् । हालै भएको आन्दोलनका कारण सुरक्षा निकायहरुसँग आवश्यक गाडीसहितका व्यवस्था पनि कम भएको अवस्थामा स्थानीय क्षत्रको सुरक्षाको लागि नागरिकस्तरबाट पहल गरेर यस किसिमको समिति बनाइएको हो । उक्त समितिले स्थानीय नागरिक, स्थानिय जनप्रतिनिधि तथा सरकार र सुरक्षा एबम प्रशासनिक निकाय संग समन्वय गरि शान्ति सुरक्षा र समन्वयको काम गर्ने बुझिएको छ ।