पोखरा, नेपाल प्रेस युनियन कास्कीले संगठनको एक सय दिने सदस्यता अभियान शुरु गरेको छ। शुक्रबार पोखरामा आयोजित एक कार्यक्रममा विभिन्न संचार माध्यममा क्रियाशील पत्रकारहरुलाई नेपाल प्रेस युनियनको सदस्यता प्रदान गरेर अभियानको शुरुवात गरिएको हो।
नेपाल प्रेस युनियनका केन्द्रिय अध्यक्ष शिब लम्सालले पोखरामा क्रियाशील पत्रकारहरु भानु पाण्डे, सागर ढकाल, बिनोद पहारी, रिदेश सुनार, सुजन पौडेल र बिमल तिवारी लगायतलाई युनियनको सदस्यता प्रदान गरेर अभियानको सुरुवात गरिएको थियो ।
उक्त कार्यक्रममा बोल्दै युनियनका अध्यक्ष शिब लम्सालले सय दिने सदस्यता अभियानले आगामी मङ्सिरमा हुने बिधान अधिबेशन र जेठमा हुने महाधिबेशनको आधार तयार हुने बताए। प्रेस युनियनले अन्तराष्ट्रिय मिडिया समिट जस्ता कार्यक्रम गरेर राष्ट्रिय एबम अन्तराष्ट्रिय संघसंस्था हरुसंग सहकार्य गर्ने अबसर प्राप्त गरेको भन्दै लम्सालले पछिल्लो समय भएका गतिविधिको कारण युनियन प्रतिको आकर्षण बढेको उल्लेख गरे ।
उनले मिडिया काउन्सिल ऐन मिडिया मैत्री भएन भने प्रेस युनियन सडक आन्दोलन गर्न समेत तयार रहेको भन्दै संचार जगतको गरिमा र प्रतिष्ठा घटाउने, अनलाइन लगायतका संचार माध्यमको दर्ता एबम नबिकरण प्रक्रिया झन्झटिलो बनाउने जस्ता काम सरकारको तर्फबाट भैरहेको भन्दै चिन्ता ब्यक्त गरे ।
उनले कात्तिक २१ गतेसम्म सञ्चालन हुने सदस्यता अभियानको क्रममा प्रेस युनियन छोडेर वा पत्रकारिता छोडेर पार्टीमा लाग्नेहरु एबम नयाँ सदस्यता लिन चाहनेहरुलाई व्यवस्थित गरिने बताए ।
कार्यक्रममा नेपाल प्रेस युनियन कास्कीका अध्यक्ष बासुदेब मिश्र र सचिब धनबहादुर गुरुङ सुमन लगायतले युनियनका गतिबिधिबारेमा प्रकाश पारेका थिए ।
