काठमाडौँ, राजाबादी आन्दोलनका क्रममा पक्राउ परेका मेडिकल व्यवसायी दुर्गा प्रसाईं रिहा भएका छन् । सोमबार उच्च अदालत पाटनको आदेश बमोजिम उनि २८ लाख रुपैया धरौटी रकम बुझाउँदै रिहा भएका हुन् ।
सोमबार उच्च अदालत पाटनले प्रसाईंलाई काठमाडौँको तिनकुने घटनाको सम्बन्धमा ३ लाख र बैंकिङ कसुर मुद्दामा २५ लाख रुपैया धरौटीमा छाड्न आदेश गरेको थियो ।
उनीमाथि लगाइएका दुई मुद्दाका सम्बन्धमा दुई छुट्टाछुट्टै इजलासबाट उक्त निर्णय भएको थियो । न्यायाशीशद्वय टंकप्रसाद गुरुङ र डिल्लीरत्न श्रेष्ठको इजलासले प्रसाईंलाई तीनकुने घटनामा ३ लाख धरौटीमा रिहा गर्न आदेश गरेका थिए भने सीआईबीको अनुसन्धान प्रतिवेदनको आधारमा दायर गरिएको बैंकिङ कसुर मुद्दामा न्यायाधीशद्वय सुदर्शनदेव भट्ट र मुनेन्द्रप्रसाद अवस्थीले प्रसाईंसँग २५ लाख धरौटी माग गरेका थिए।
उनी गत चैत्र १५ गते काठमाडौँको तीनकुनेमा राजावादी प्रदर्शनमा संलग्न रहेको आरोपमा पक्राउ परेका थिए । प्रसाईंलाई लिन कांग्रेस सांसद डा.सुनिल शर्मा डिल्लीबजार कारागार पुगेका थिए ।
यसैबीच कारागारबाट निस्केका प्रसाईंले आँफु गणतन्त्र प्राप्तिको आन्दोलनमा पनि करिब छ महिना जेल बसेको स्मरण गर्दै अहिले गणतन्त्र बिरोधि आन्दोलनमा पनि पांच महिना जेल बस्नुपरेको बताए।
‘मेरो परिवारका सदस्यहरुलाई पनि सरकारले बैंकिंग कसुरको मुद्दा लगाएको छ। सरकारले म र मेरो परिवारलाई जेल भित्र राख्ने चाहना गरेको थियो तर, सत्य अल्पमतमा रहेपनि अन्तिममा सत्यको बिजय हुन्छ। तसर्थ अहिले सरकारले जे जस्तो गरेपनि देश र जनताको लागि हामीले शुरु गरेको आन्दोलनले सफलता पाउँछ’।’
