पोखरा, बिगतमा माओबादी आन्दोलनमा सक्रिय रहेपनि समयक्रमसंगै माओबादीबाट टाढा हुन पुगेका कास्कीका केहि नेता फेरी माओबादीमा नै फर्किएका छन । पूर्व माओबादी नेता बाबुराम भट्टराई नेतृत्वको नेपाल समाजवादी पार्टी (नयाँशक्ति)को गण्डकी प्रदेश अध्यक्ष रहेका किरण थापा (आमोद) र कास्की जिल्ला अध्यक्ष रहेका राजु क्षेत्रीसहितका केहि नेताहरु पुरानो घर माओबादीमा नै फर्किएका हुन ।

माओवादी अध्यक्ष समेत रहेका पुर्ब प्रधानमन्त्री पुष्पकमल दाहाल प्रचण्डले मंगलबार पोखरामा आयोजित कार्यक्रममा नवप्रवेशीहरुलाई स्वागत गरे ।

माओवादी केन्द्रको पोखरा महानगर सम्मेलनका क्रममा प्रचण्ड पोखरा आइपुगेका हुन् । त्यही अवसरमा नेताद्वय थापा र क्षेत्री आफ्नो पुरानै पार्टीमा फर्किएका हुन । नेसपाको गण्डकी अध्यक्षभन्दा अघि थापा पार्टी केन्द्रीय सचिवालय सदस्य पनि भइसकेका हुन् ।

उक्त पार्टीको हालै भएको महाधिवेशनमा थापाको टिमले नेसपा माओवादीसँग नजिकिँदै जानुपर्ने लगायत अवधारणा पेस गरेका थिए । तर उनको लाइन महाधिवेशनले अस्वीकार गरेको थियो । थापा तत्कालीन माओवादी जनयुद्धमा जनमुक्ति सेनाको बटालियन कमाण्डर, प्लाटुन कमिसार समेत थिए । पार्टी शान्ति प्रक्रियामा आएपछि सेना समायोजनका बेला उनी राजनीतिक क्षेत्रमा बस्न रुचाए ।

नेसपाको जिल्ला अध्यक्ष त्यागेर माओवादी केन्द्र फर्किएका राजु जनादेश साप्ताहिकको कार्यकारी सम्पादक भइसकेका हुन् । माओवादी जनयुद्धमा भूमिगत रुपमा लागेका उनको उक्त पार्टीसँगको निकटता विद्यार्थीकालबाटै सुरु भएको थियो । विद्यार्थी फाँट हुँदै भूमिगत भएका उनलाई जनयुद्धकै बेला नेपाली सेनाले गिरफ्तार गरेको थियो । उनी धादिङको सैनिक ब्यारेक तोडेर निस्कन सफल भएका थिए ।