पोखरा,  जिल्ला प्रहरी कार्यालय कास्की, मातहत प्रहरी इकाइहरू र जिल्ला ट्राफिक प्रहरी कार्यालय कास्कीले संयुक्त रुपमा शुरु गरेको अभियान अन्तर्गत स्वरूप परिवर्तन (मोडिफाइ) गरी चर्को आवाजमा ध्वनी प्रदूषण गर्दै सडकमा गुडेका ३५ वटा मोटरसाइकल नियन्त्रणमा लिईएको छ ।

वैशाख ३ गतेदेखि वैशाख १४ गतेसम्म गरिएको चेकजाँचमा ३५ वटा मोटरसाइकलहरू नियन्त्रणमा लिई आवश्यक कारवाहीका लागि यातायात व्यवस्था कार्यालय पोखरा पठाइएको जिल्ला ट्राफिक प्रहरी कार्यालय कास्कीका प्रमुख एबम प्रहरी निरिक्षक शोभा पाण्डेले गुरुकुल खबरलाई जानकारी दिईन।

सवारी साधनको स्वरुप परिवर्तन गरी ध्वनी प्रदूषण गर्ने क्रियाकलापले जनस्वास्थ्यमा प्रतिकूल असर पार्ने भन्दै कडाइका साथ निगरानी थालेको भन्दै जिल्ला प्रहरी कार्यालय कास्कीका प्रहरी नायव उपरीक्षक (प्रनाउ) वसन्तकुमार शर्माले यो अभियानलाई निरन्तरता दिईने बताए ।

जिल्ला प्रहरी कार्यालयले कसैले स्वरुप परिवर्तन गरी ध्वनी प्रदूषण गर्दै मोटरसाइकल चलाएको थाहा पाएमा जिल्ला प्रहरी कार्यालयको ‘१००’ नम्बर वा जिल्ला ट्राफिक प्रहरी कार्यालयको ‘१०३’ नम्बरमा टेलिफोन गरी सूचना दिन अनुरोध समेत गरेको छ।