पोखरा,  नेपाली संस्कृतिको संरक्षण र परम्परागत नेपाली खाना तथा आन्तरिक एवं वाह्य पर्यटन प्रवर्द्धन गर्ने मुख्य उद्देश्य सहित पर्यटनको राजधानी पोखरामा “२० औं फेवा नबबर्ष महोत्सव- २०८२” को तयारीमा तिब्रता दिईएको छ । चैत ३० गते देखि आगामी वैशाख १ गते सम्म फेवा किनार लेकसाइडको करिब ३ किमी सडक क्षेत्रमा यो महोत्सव संचालन हुँदैछ । महोत्सवमा निःशुल्क प्रवेशको व्यवस्था रहेको काठमाडौँमा शुक्रबार आयोजित पत्रकार सम्मेलनमा जानकारी दिईएको हो ।

पत्रकार सम्मेलनमा होटल संघ नेपालका केन्द्रीय अध्यक्ष विनायक शाह लगायत पोखरा होटल संघका पदाधिकारी एबम अन्यले महोत्सब र पोखराको पर्यटनको बारेमा जानकारी दिएका थिए । पत्रकार सम्मेलनमा पोखरा होटल संघका निबर्तमान अध्यक्ष विकल तुलाचन, संघका प्रथम उपाध्य्क्ष दिपक श्रेष्ठ, नेपाल पर्यटन बोर्ड गण्डकीका प्रमुख मणिराज लामिछाने लगायतले आआफ्नो भनाई राखेका थिए ।

काठमाडौँमा आयोजित पत्रकार सम्मेलनमा सहभागी हुन पोखराबाट हिंडेका पोखरा होटल संघका अध्यक्ष लक्ष्मण सुबेदी भने पोखरा विमानस्थलमा नै रोकिन पुगेका थिए पोखरा बिमानस्थलबाट काठमाडौँको उडानमा ढिलाई भएपछि सुबेदी काठमाडौँको कार्यक्रममा पुग्न सकेनन। पोखरा – काठमाडौँको बिमान सुचारु हुन नसकेपछि पोखरा बिमानस्थलमा सैयौं पर्यटकहरु अलपत्र परेको छन।

नेपाली नयाँ बर्षलाई उल्लासमय रुपमा मनाउने र राष्ट्रिय तथा अन्तराष्ट्रिय रुपमा यसको प्रचारप्रसार गरी आफ्नो मौलिक संस्कृतिको रक्षा गर्ने अभिप्रायले सांस्कृतिक झाँकी सहित महोत्सवको आरम्भ हुने बताइएको छ । नेपाली खानाको प्रदर्शनी र प्रवर्द्धनलाई पनि महोत्सवमा विशेष जोड दिइनेछ । महोत्सवका अवसरमा पोखरा आउने पाहुनाका लागि संघ अन्तर्गतका होटलहरुको प्रकाशित दररेटमा २० प्रतिशत छुट प्रदान गरिने र पर्यटकीय प्रतिष्ठान र व्यवसायीले पनि विभिन्न किसिमको छुट तथा सहुलियत प्रदान भएका छन । नेपाली संस्कृतिको जगेर्ना गर्दै पोखराको पर्यटन प्रवर्द्धन गर्ने र पर्यटकहरुको वसाई अवधि लम्व्याई आर्थिक चलायमानमा वृद्धि गर्ने महोत्सवको मुख्य उदेश्य रहेको आयोजक पोखरा होटल संघका अध्यक्ष लक्ष्मण सुबेदीले गुरुकुल खबरलाई जानकारी दिए ।

महोत्सवकै प्रचारप्रसारका लागि संघले नेपाल पर्यटन बोर्डको सहयोगमा पूर्वी नेपालका प्रमुख शहरहरुमा हालै “जाउँ है पोखरा” अभियान संचालन गरी त्यस क्षेत्रका वासिन्दालाई फेवा महोत्सवमा सहभागीताका लागि होटल संघले आमन्त्रण गरिसकेको छ । संघले घुमघाम पोखरा, शैक्षिक भ्रमण पोखरा र मधुमास पोखरा जस्ता प्याकेज पनि पर्यटकका लागि घोषणा गरेको छ ।

सन् २०२५ लाई पोखरा महानगरपालिकाद्धारा पोखरा भ्रमण वर्ष घोषणा गरीए पश्चात आयोजना गर्न लागिएको यस महोत्सवले भ्रमण वर्षको लक्ष्यलाई पुरा गर्न सघाउ पुऱ्याउनेछ । महोत्सवलाई सफतापुर्वक सम्पन्न गर्न २१ भन्दा बढी समिति गठन गरी एरिया संयोजकहरु समेत तोकिएको छ ।

प्रदेश स्तरीय मौलिक तथा रैथाने परम्परागत खानाको प्रदर्शन, सांस्कृतिक कार्यक्रमहरुको प्रस्तुती, मनोरञ्जनात्मक खेलकुद कार्यक्रम, पर्यटक दौड प्रतियोगिता, व्याडमिन्टन कप, स्थानिय एवम् प्रख्यात कलाकारद्धारा प्रत्यक्ष पप कन्सर्ट, कृषी एवम् हस्तकलाका सामानहरुको प्रदर्शनी तथा स्थानीय तथा प्रख्यात कलाकारद्धारा लोक दोहोरी कार्यक्रम महोत्सवका आकर्षणहरु रहनेछन ।

महोत्सवको मुख्य प्रायोजक गोर्खा ब्रुअरी प्रा.ली, सह प्रायोजक वरुण वेभरेज लि.को पेप्सी, प्रायोजकहरुमा बन्दीपुर केवलकार लि. फोन पे, अन्नपुर्ण केवलकार लि. टोकला चिया, रहेका छन् भने इन्सुरेन्स पार्टनरमा प्रभु इन्सुरेन्स कम्पनी र प्रवर्द्धकमा नेपाल पर्यटन बोर्ड गण्डकी प्रदेश, पोखरा महानगरपालिका रहनेछन् । होटल संघ नेपाल, पोखरा पर्यटन परिषद, गण्डकी प्रदेश सरकार, जिल्ला प्रशासन कार्यालय एवम् विभिन्न व्यावसायिक प्रतिष्ठानहरुले महोत्सबको लागि सहयोग गर्ने विश्वास आयोजकको रहेको छ ।