काठमाडौं, काठमाडौंको तीनकुनेमा शुक्रबार भएको हिंसात्मक घटनामा पक्राउ परेका ४१ जनालाई थुनामा राखेर अनुसन्धान गर्न काठमाडौं जिल्ला अदालतले पांच दिनको म्याद थप गरेको छ। काठमाडौं जिल्ला अदालतकी न्यायाधीश तारादेवी महर्जनको इजलासले ४१ जनालाई पाँच दिन थुनामा राखेर थप अनुसन्धान गर्न अनुमति दिएको हो।

गत शुक्रबार राजावादीले गरेको प्रदर्शनले हिंसात्मक रुप लिएपछि एक जना टेलीभिजन पत्रकार सहित दुई जनाको मृत्यु भएको थियो भने कैयौ घाइते भएका थिए । सोही घटनामा पक्राउ परेकाहरुलाई हिरासतमा राखेर अनुसन्धान गर्न अनुमति दिइएको काठमाडौं प्रहरी परिसरका प्रवक्ता अपिलराज बोहोराले संचारकर्मीहरुलाई बताएका छन ।  उनका अनुसार ४१ जनाविरूद्ध दुइटा अनुसन्धान प्रतिवेदन तयार गरी अनुसन्धान अघि बढाइने भएको छ ।

प्रहरीले राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष ५९ बर्षीय रवीन्द्र मिश्र, सांसद समेत रहेका राप्रपा नेता ६२ बर्षीय धवल शमशेर राणासहित ११ जनालाई राज्य बिरुद्धको कसुर र संगठित अपराध सम्बन्धि मुद्दामा अनुसन्धान गर्ने जनाएको छ । व्यवस्था विरुद्धको राजसंस्था पुनर्स्थापना जनआन्दोलनका नेताद्वय डा धवल शम्शेर राणा र रवीन्द्र मिश्रले आफुहरुले अस्पतालमा बस्ने सुविधा नलिने स्वघोषणा गर्दै प्रहरी हिरासतमा बसेर लडाइ लड्ने बताएका  छन् ।

‘स्वास्थ्य समस्याका कारण प्राप्त हुने अस्पताल बस्ने सुविधा म लिन इन्कार गर्दछु,’ संयुक्त जनआन्दोलन परिचालन समितिका सदस्य सचिव तथा राप्रपा उपाध्यक्ष मिश्रले काठमाडौं जिल्ला अदालतको इजलासमा आइतबार भने । ‘राज्यले ज्यान लिन्छ भने लिओस्‌, साथीको (रवीन्द्र मिश्र) साथ छाड्दिनँ, हिरासतमै बसेर लडाई लड्छु,’ आन्दोलन परिचालन संयोजक राणाले पनि इजलासमा बताएको उनका वकिलले बताए ।

उनीहरूलाई धेरै उग्र भएर तोडफोड र आगजनीमा लागेको प्रहरीको निष्कर्ष छ ।  यसैगरी सोहि घटनाका सन्दर्भमा पक्राउ परेका अन्‍य ३० जनालाई आपराधिक उपद्रव र संगठित अपराधमा अनुसन्धान गर्न म्याद दिएको हो । यसैगरी अरू ३० जना पनि विभिन्न सिसिटिभी फुटेज, भिडिओ, फोटोमा देखिएका व्यक्तिहरूलाई पक्राउ प्रहरीले जनाएको छ ।

पक्राउ परेका उनीहरूमाथि आपराधिक उपद्रव र संगठित अपराध सम्बन्धी कसूरमा मुद्दा चलाइएको छ । उनीहरु आगजानी तोडफोड र लुटपाटमा संलग्न भएको प्रहरीको आरोप छ।

तीनकुने घटनामा पक्राउ परेका व्‍यक्तिहरुको सूची ..