पोखरा, पोखरा महानगरपालिकाका मेयर धनराज आचार्य अस्पतालकाे १२ दिनकाे बसाईपछि काममा फर्किएका छन् । गत ३ गते पोखरा भ्रमण वर्ष २०२५ को घोषणा कार्यक्रममा बेलुनमा आगो लाग्दा उनी घाइते भएका थिए ।
किर्तिपुर अस्पताल, काठमाडौंमा उपचाररत मेयरले काममा फर्किएको सामाजिक संजाल फेसबुक मार्फत जानकारी दिएका छन् । कार्यक्रममा दुर्घटना हुँदा अर्थमन्त्री विष्णु पौडेल र मेयर आचार्य घाइते भएका थिए । अर्थमन्त्री पौडेल अस्पतालबाट डिस्चार्ज भइसकेका छन् ।
जलनका कारण हुनसक्ने साइड इफेक्टका विषयमा डाक्टरले विशेष सावधानी अपनाउन सुझाव दिएको आर्चायले बताए । उनका अनुसार कम्तिमा ६ महिना प्रत्यक्ष घामको सम्पर्कमा नजान, भिडभाडमा नजाने, जानै परे दूरी कायम गर्ने । नियमित स्वास्थ्य परीक्षण गराउने।चिकित्सकको सल्लाह अनिवार्य रुपमा पालना गर्ने डाक्टरको सुझाव छ ।
मेयरले ‘समृद्ध पोखराको आधार, सबल अर्थतन्त्र र पूर्वाधार’ को लक्ष्यलाई प्रभावकारी रुपमा अघि बढाउने प्रतिबद्धता जनाएका छन् । उनले पोखराको विकासका लागि सबैको साथ, सहयोग, र सुझाव आवश्यक रहेको बताउँदै निरन्तर सहयोगको अपेक्षा गरेका छन् ।
मेयर आचार्यले फेसबुकमा लेखेको कुरा..
“१२ दिन पछि काममा फर्कदै छु”
‘पोखरा भ्रमण वर्ष २०२५’ को औपचारिक घोषणा समारोहका क्रममा भएको प्राविधिक त्रुटिका कारण नेपाल सरकारका उपप्रधानमन्त्री तथा अर्थमन्त्री माननीय विष्णु पौडेलज्यू र म दुर्घटनावश जलनका कारण किर्तिपुर अस्पताल, काठमाडौंमा भर्ना भएर उपचाररत थियौं। केही दिनको अस्पताल बसाइपछि माननीय उपप्रधानमन्त्रीज्यू अस्पतालबाट डिस्चार्ज हुनुभयो भने मलाई थप केही दिन अस्पतालमा बस्नुपर्ने भयो।
उपचारमा संलग्न गण्डकी मेडिकल कलेज पोखरा, फिस्टेल अस्पताल पोखरा, किर्तिपुर अस्पताल काठमाडौं लगायतका विशेषज्ञ चिकित्सकहरू, स्वास्थ्यकर्मी तथा सम्पूर्ण अस्पताल परिवारलाई हृदयदेखि आभार व्यक्त गर्दछु।
यस कठिन समयमा मेरो स्वास्थ्यलाभको कामना गर्दै आत्मीय स्नेह, आशीर्वाद, र हौसला प्रदान गर्ने सम्माननीय राष्ट्रपति रामचन्द्र पौडेलज्यू, सम्माननीय प्रधानमन्त्री केपी शर्मा ओलीज्यू, सम्माननीय सभामुख, प्रधानन्यायाधीश, पूर्वप्रधानमन्त्रीज्यूहरू शेरबहादुर देउवा, माधवकुमार नेपाल, झलनाथ खनाल, माननीय उपप्रधानमन्त्रीज्यू, नेपाल सरकारका माननीय मन्त्रीज्यूहरू, संघीय तथा प्रदेश सांसदज्यूहरू, राष्ट्रिय एवं अन्तर्राष्ट्रिय कूटनीतिक नियोगका व्यक्तित्वहरू, महानगर परिवार, स्थानीय प्रशासन, सुरक्षाकर्मी, मिडिया प्रतिनिधिहरू, पोखरेली जनसमुदाय तथा स्वदेश र विदेशमा रहनुभएका सम्पूर्ण साथीहरू, शुभेच्छुक महानुभावहरू प्रति हार्दिक धन्यवाद व्यक्त गर्दछु।
‘समृद्ध पोखराको आधार, सबल अर्थतन्त्र र पूर्वाधार’ को लक्ष्यलाई अझ प्रभावकारी रूपमा अघि बढाउन तपाईंहरूको साथ, सहयोग, र सुझाव सधैं अपेक्षित रहनेछ।
यस कठिन घडीमा तपाईंहरूले प्रदान गर्नुभएको सद्भाव, मायालु सन्देश, र मनोबल अत्यन्त प्रेरणादायी रहेका छन्।
आज १२ दिन लामो अस्पताल तथा आइसोलेसन बसाइपछि म पोखरा फर्कँदै छु र नियमित काममा फर्कने तयारी गर्दैछु। जलनका कारण हुन सक्ने साइड इफेक्ट तथा आवश्यक स्वास्थ्य सावधानी कडाईका साथ पालना गर्नुपर्ने भएकाले तपाईंहरू सबैको सहयोगको अपेक्षा गर्दछु।
विशेष स्वास्थ्य सावधानीहरू:
*कम्तिमा ६ महिना घाममा प्रत्यक्ष सम्पर्क गर्न नमिल्ने
*भिडभाडमा सकेसम्म नजाने जानै पर्ने भएमा दूरी कायम राख्ने
*हात नमिलाउने, किनभने छालाको क्यान्सरको जोखिम हुनसक्ने भएकाले तोकिएको स्वास्थ्य प्रोटोकल अनिवार्य रूपमा पालना गर्नुपर्ने
*नियमित स्वास्थ परिक्षण गराउने
*डाक्टरको सल्लाह नियमित रुपमा लिनु पर्ने ।
तपाईंहरूको निरन्तर माया, सद्भाव, र साथका लागि पुनः हार्दिक धन्यवाद तथा कृतज्ञता व्यक्त गर्दछु।
धनराज आचार्य
प्रमुख, पोखरा महानगरपालिका
१५ फाल्गुन २०८१, बिहीबार १८:१० मा प्रकाशित
