पोखरा, पोखरा भ्रमण बर्ष कार्यक्रमको डिजिटल इनागुरेसन गर्ने क्रममा हाइड्रोजन ग्यास भरिएका बेलुनहरू आगलागी भई पड्किंदा भएको दुर्घटनामा परि घाइते भएका नेपाल सरकारका उपप्रधानमन्त्री एबम अर्थमन्त्री बिष्णुप्रसाद पौडेल र पोखरा महानगरका मेयर धनराज आचार्यको उच्च निगरानीमा उपचार गर्नुपर्ने भएको छ।
काठमाडौँको किर्तिपुरस्थित बर्न अस्पतालमा उपचार गराइरहेका पौडेल र आचार्यको अनुहारमा जलन भएको कारण श्वास नली र फोक्सोमा असर पर्न सक्ने भएकोले उनीहरुको उपचार उच्च निगरानीमा गर्नुपर्ने अस्पतालले बिज्ञप्ति मार्फत जनाएको हो ।
अस्पतालका अनुसार प्रारम्भिक मुल्यांकन अनुसार उनीहरुको शरीरमा ५/६ प्रतिशतमात्र जलन भएको भएपनि अनुहारमा जलन भएकोले उच्च निगरानी आबश्यक भएको हो।
पोखरामा पोखरा भ्रमण बर्ष -२०२५ को उद्घाटन गर्ने क्रममा मन्त्री पौडेल र मेयर आचार्य बेलुन पड्किएर घाइते भएपछी पोखरामा सामान्य उपचार गरि थप उपचारको लागि हेलिकप्टरबाट काठमाडौँ लागिएको थियो।
उनीहरुलाई शनिबार दिउँसो ३.३० बजे अस्पतालमा भर्ना गरिएको अस्पतालले जनाएको छ ।
