झापा,  गीतकार सत्यनारायण तायलको शव्द तथा निर्माणमा नेपाली लोक मारुनी ‘गीत लाएँ माया तिमीलाई छानी’ को म्युजिक भिडियो ओएसआर डिजिटल युटुब च्यानलबाट रीलिज गरिएको छ।

रेडियो नेपालकी गायिका पबित्रा ओलिको अध्यक्षतामा बिर्तामोडमा सम्पन्न कार्यक्रममा बरिष्ठ साहित्यकार तथा गीतकार केशव आचार्यले गीतको बिमोचन गरेपछि युटुबबाट रिलिज गरिएको हो। कार्यक्रममा गीतको भिडियोमा प्रमुख अभिनय गर्ने माही शर्माको पनि उपस्थिति रहेको थियो ।

मारवाडी भाषामा गीत कबिता लेखेर पछिल्लो समय चर्चा बटुल्दै आएका गीतकारको यो पहिलो नेपाली लोक मारुनी गीत हो । गायक निरज पोखरेल र गायिका मेलिना राइको स्वरमा रहेको गीतमा सङ्गीत पनि गायक पोखरेलकै रहेको छ।

कार्यक्रममा गीतकारको तर्फबाट सत्यनारायण तायलले गीतको बारेमा चर्चा गरेका थिए भने गायिका पबित्रा ओली र गायक निरज पोखरेलले गीत प्रस्तुत गरेका थिए।

उक्त कार्यक्रममा बरिष्ठ साहित्यकार टक बिकल्प, माधब पौडेल ओम प्रकाश भट्टराई, गायक उमेश पान्डे, प्रदीप महतो, निमेष शिवाकोटी, गीतकार तथा साहित्यकार लबकुश गौतम लगायतले गीत संगीतको बारेमा आआफ्नो भनाई राखेका थिए ।