पोखरा, पोखरा महानगरको विभिन्न स्थानमा रहेका बर्षौं पुराना रुखहरु काटिएको घटना सम्बन्धमा अख्तियार दुरुपयोग अनुसन्धानको कार्यालय पोखराले अनुसन्धान गर्ने भएको छ । बिशेष गरि पोखरा महानगरपालिका वडा नम्बर १४, १३ र ६ का सयौं वर्ष पुराना ऐतिहासिक चौताराका वरपीपलका रुख ठुटो हुने गरी काटिएको छ।
केहि महिना यता बजारको विभिन्न क्षेत्रमा बर, पिपल, समी वा अन्य पुराना र धार्मिक दृष्टिले महत्वपूर्ण रुख ठुटो हुने गरि काट्न लागिएको भएपनि आम सर्बसाधारणले सामाजिक संजालबाट चर्को विरोध गर्न लागेपछी पोखरा महानगर पालिकाको कार्यालय सहित सरोकारवालाले चासोदेखाके देखाएका थिए। त्यसपछी मात्र पोखरा महानगरले पोखरामा कोटीहोम सहितको महायज्ञको लागि संकलन गरिएको करिब ५० ट्रक दाउरा जफत गरेको छ ।
वन कार्यालय कास्कीले ऐन विपरीत पुराना वरपीपलका रुख काटिएकाले मुद्दा लाग्ने भनिरहेका बेला अख्तियार कार्यालय पोखराले अनुसन्धान अगाडि बढाएको जनाएको छ ।
अख्तियार दुरुपयोग अनुसन्धानको कार्यालय पोखराका प्रमुख आस्मान तामाङले उजुरी परेपछि वरपीपलका रुख कटानबारे अनुसन्धान भइरहेको जानकारी दिए । ‘हाम्रो कार्यालयमा उजुरी पर्यो । केन्द्रीय कार्यालयले नै यस विषयमा थप अनुसन्धान गर्नु भनेपछि यस विषयमा थप बुझ्ने काम भइरहेको छ,’ उनले भने ।
प्रमुख तामाङका अनुसार अहिले डिभिजन वन कार्यालय कास्कीसँग रुख काटिएको विषयबारेमा प्रतिवेदन माग भएको छ । ‘खास यो विषय वन कार्यालयसँग सम्बन्धित छ । यहाँबाट प्रारम्भिक प्रतिवेदन माग भएको छ । के भएको हो ? किन, यसरी काटियो ? कसले काट्यो, किन काट्यो ? खुल्दै जाला ! त्यसपछि के भएको हो, हाम्रो कार्यालयले अनुसन्धान गर्छ,’ उनले भने ।
