पोखरा, अभियन्ताको रुपमा परिचित मेडिकल व्यवसायी दुर्गा प्रसाईंलाई प्रहरीले पक्राउ गरेपछि स्वास्थ्य परीक्षणका लागि अस्पताल लगिएको छ ।  मंगलबार दिउँसो भक्तपुरस्थित उनको निवासबाट पक्राउ परेका प्रसाईंलाई केन्द्रीय अनुसन्धान ब्युरो (सीआईबी)मा ल्याइएसँगै स्वास्थ्य परीक्षणका लागि भन्दै अस्पताल लगिएको हो ।

सिआइबिका प्रवक्ता होबिन्द्र बोगटीले प्रसाईंलाई साइबर अपराध गरेको अभियोगमा पक्राउ गरिएको बताए । प्रसाईंले सोमबार प्रधानमन्त्री केपी शर्मा ओलीको कम्बोडियामा अरबौंको लगानी रहेको भन्दै विवादास्पद भिडियो सार्वजनिक गरेका थिए ।

सोमबार प्रसाईंले प्रधानमन्त्री ओली बिरुद्ध प्रचारमा ल्याएको सामग्रीलाई ‘फेक डकुमेन्ट’ मानिएको छ । सीआईबी प्रवक्ता होविन्द्र बोगटी  ‘फेक डकुमेन्ट’ को सहारामा प्रधानमन्त्री केपी शर्मा ओलीविरुद्ध दुष्प्रचार गरेको पाइएपछि नियन्त्रणमा लिइएको संचारमाध्यमलाई जानकारी दिएका छन ।