पोखरा । गण्डकी प्रदेशसभामा सांकेतिक दोभासे राख्न प्रदेश सांसद सरस्वती गुरुङले माग गरेकी छिन् । संसद् सुरु भएको ६ वर्ष बितिसक्दा पनि अपाङ्गता भएकाको पहुँच पुग्न नसकेको गण्डकी प्रदेश सभा बैठकमा नियमित रूपमा सांकेतिक भाषाको दोभासे राख्न उनको माग छ ।

‘जनताको सार्वभौम सम्पन्न संसदमा हामी छौं । जनताकै मतबाट निर्वाचित भएर यहाँ हामी उपस्थित भएका हौं,’ उनले भनिन्, ‘हामीले बोलेका र राखेका धारणाहरू बुझ्ने र सुन्ने सबै नागरिकको अधिकार छ । हामीले बोलेका कुरा सुन्न आतुर तर सुन्न नपाएको एउटा समूह छ, श्रवण शक्ति कम भएका नागरिकहरू । उनीहरूले पनि सांसदलाई सुन्न पाउनुपर्छ ।’

गुरुङले संसदीय गतिविधिमा सबै नागरिकको पहुँच आवश्यक रहेको बताइन् । ‘म यो सम्मानित सभा मार्फत संसद् सचिवालयको ध्यानाकर्षण गराउँदछु कि, संसदमा माननीयहरूले बोलेका बेलामा सांकेतिक भाषा मार्फत पनि आम नागरिकहरूमा सांसदलाई पुर्‍याइयोस्,’ उनले भनिन्, ‘सँगै प्रदेश सरकार मातहत निर्माण हुने सम्पूर्ण पूर्वाधारहरूलाई अपाङ्गता मैत्री बनाउनका लागि पनि सरकारको ध्यानाकर्षण गराउँदछु।’