पोखरा, रबिन एण्ड न्यू रिभोलुसन ब्याडका मुख्य गायक एवं कलाकार रबिन तामाङ मंगलबार बेलुका बुढानिलकण्ठ चिसेनीस्थित आफ्नै घरमा मृत भेटिएका छन् । उनी आफ्नो कोठामा घोप्टो परेको अवस्थामा भेटिएको प्रहरीले जनाएको छ ।
घटनाका बखत उनकी पत्नी घरबाहिर थिइन् । धेरै पटक फोन गर्दा पनि फोन नउठेपछि उनले गायक तामाङको अवस्था बुझ्न घरमा आफन्तलाई पठाएकी थिइन् तर गेट नखुलेपछि प्रहरीलाई खबर गरिएको थियो । प्रहरी तामाङ भएको ठाउँमा पुग्दा कोठाभित्रबाट चुकुल लगाइएको र ढोका खोली हेर्दा तामाङको निधन भइसकेको जनाइएको छ ।

तामाङको स्वाभाविक मृत्यु हो वा अन्य केही भन्ने बारे पोष्टमार्टम रिपोर्टपछि मात्र थाह हुने प्रहरीले जनाएको छ । उनको शब पोष्टमार्टमका लागि लगिसकिएको छ । तामाङ खासमा चर्चित रक गायक हुन् । युवा पुस्ता र अलि पुरानो पुस्तामाझ उनी लोकप्रिय थिए ।