पोखरा, नेपालले सिंगापुरलाई ९७ रनले हराउँदै एसीसी यू १६ इस्ट जोन कप क्रिकेटको फाइनलमा पुगेको छ । मलेसियाको बायोमास ओभल क्रिकेट मैदानमा सिंगापुरलाई ९७ रनले हराउँदै नेपाल फाइनलमा पुगेको हो ।

नेपालले दिएको १८५ रनको लक्ष्य पछ्याएको सिंगापुरले ३१ दशमलव तीन ओभरमा ८७ रनमा सबै खेलाडी गुमायो । नेपालले आज उत्कृष्ट खेल प्रदर्शन गरेको थियो । कृतिक कामतले सर्बाधिक ३ विकेट लिए । उनले २ दशमलव ३ ओभरमा ९ रन खर्चेर ३ विकेट लिए भने कप्तान अभिषेक तिवारी, प्रतीक पोखरेल, सन्तोष यादव, अशोक धामी र नरेनले एक एक विकेट लिए । सिंगापुरको इनिङ्स कमजोर बनाउन नेपालका सबै बलरहरुले उत्कृष्ट प्रदर्शन गरेका थिए ।

सिंगापुरका ओपनर श्रेयन च्यायु २ रनमा आउट भएपछि आएका रहील थाक्करले अर्का ओपनर रोशन रविचन्द्रनसंग मिलेर ४३ रनको साझेदारी गरे । रविचन्द्रनले सर्वाधिक २४ रन बनाए भने थाक्करले ७ रन जोडे । कविर बेर्लियाले ११ र प्रनव धनुकाले १४ रन बनाउनुबाहेक दोहोरो अंकको रन बनाउन सकेनन् । खेल सुरु हुनु अघि टस जितेर पहिला ब्याटिङ गरेको नेपालले निर्धारित ३५ ओभरमा ९ विकेट गुमाउँदै १८४ रन जोडेको थियो । नेपालका लागि ओपनरद्वय सूर्यांशु कोइराला र निरजकुमार यादवले पहिलो विकेटका लागि ६३ रनको साझेदारी प्रदर्शन गरे ।

कोइरालाले ४३ रन बनाए भने निरजकुमार यादव चौथो विकेटका रुपमा ४२ रनमा आउट भए । कप्तान अभिषेक तिवारी २५ रनमा आउट भए । सिंगापुरका हरिहरणले ३ विकेट लिए । नेपालले अब फाइनलमा मंगलबार घरेलु टोली मलेसियासँग प्रतिस्पर्धा गर्ने छ । अर्को सेमिफाइनलमा हङकङलाई हराउँदै मलेसियाले नेपालसँगको फाइनल तालिका तय गरेको हो ।