पोखरा । नेपाली साहित्यका स्थापित साहित्यकार उषा शेरचनलाई यस वर्षको भूपी काव्य पुरस्कार प्रदान गरिने भएको छ ।
कवि भूपी शेरचनको स्मृतिमा उनको परिवारबाट स्थापित र थकाली सेवा समिति पोखराद्वारा सञ्चालित यो पुरस्कार साहित्यकार शेरचनलाई प्रदान गरिने भएको हो । उक्त पुरस्कारको राशि नगद ५० हजार, दोसल्ला र सम्मानपत्र रहेको छ ।
पुस १० गते ८९ औँ भूपी जयन्तीकोे अवसरमा पोखरामा आयोजना गरिने एक कार्यक्रममा साहित्यकार शेरचनलाई सो पुरस्कार प्रदान गरिनेछ ।
पुरस्कार छनौट समिति संयोजक अशोककुमार भट्टचनको संयोजकत्वमा बसेको बैठकले यस वर्षको पुरस्कार शेरचनलाई प्रदान गर्ने निर्णय गरेको हो ।
पुरस्कार छनोट समितिमा साहित्यकार सरुभक्त श्रेष्ठ, पोखरा प्रज्ञा प्रतिष्ठानका कुलपति पदमराज ढकाल, थकाली सेवा समिति अध्यक्ष इन्जिनियर रुजिन्द्र तुलाचन र कार्यसमिति सदस्य ज्योति शेरचन थिए ।
शेरचनले यसअघि व्यथित काव्य पुरस्कार २०४३, व्यथित काव्य वनिता पुरस्कार २०६९, योगेश्वर कला सहित्य पुरस्कार २०७०, नातिकाजी संगीत पुरस्कार २०७२, बासु शशि स्मृति वानीरा पुरस्कार २०७८, पारिजात राष्ट्रिय प्रतिभा पुरस्कार २०५७ बाट पुरस्कृत भईसकेकी छन् ।
यसैगरी उनले रत्नश्री सुवर्ण पदक २०४०, कविता महोत्सव पदक २०४५, वीरेन्द्र ऐश्वर्य सेवा पदक २०५८, विश्वनारी नेपाली साहित्य पदक २०७१, भानुभक्त स्वर्ण पदक २०७१ र सत्यमोहन जोशी शताब्दी पदक २०७३ पनि प्राप्त गरिसकेकी छन् । कृतिहरुमा नजन्मेका आस्थाहरु कविता संग्रह २०४८, अक्षरहरुका शिविरबाट मुक्तक संग्रह २०५६, सर्वकालीन पीडा र जागृतिका शंखघोष कविता संग्रह २०६३, तेस्रो रङ्ग कथा संग्रह २०७०, आँधी उपन्यास २०७६ लगायत दर्जनभन्दा बढी कृति प्रकाशित छन् ।
हरेक २ वर्षमा दिइँदै आएको यो पुरस्कारबाट यसअघि साहित्यकार सरस्वती प्रतीक्षा, मोमिला, रत्नशमशेर थापा र तीर्थ श्रेष्ठ पुरस्कृत भइसकेका छन् ।
विस १९९२ पुस १० गते मुस्ताङमा जन्मिएका भूपीका ‘घुम्ने मेचमाथि अन्धो मान्छे’ कवितासंग्रह २०२५, परिर्वतन नाटक २०१०, नयाँ झयाउरे कविता २०१० र निर्झर कविता २०१५ प्रकाशित छन् ।
