पोखरा महानगरपालिकाले व्यक्ति तथा निजी कम्पनीका शौचालयहरुलाई सर्वसाधारणले निःशुल्क प्रयोग गर्ने गरी सञ्चालनमा ल्याएको छ ।देशकै मुख्य पर्यटकीय शहर पोखराको बजार क्षेत्रमा अत्यावश्यक सार्वजनिक शौचालय नहुँदा सर्वसाधारणले सास्ती पाइरहेको अवस्थामा महानगरले आजदेखी निजी साझेदारीमा ३२ स्थानमा  शौचालयलाई सार्वजनिक प्रयोगमा ल्याएको हो ।

पोखरा महानगरपालिका–९ न्यूरोडमा अवस्थित सिटी स्क्वायर ब्याङक्युट एण्ड रेष्टुरेण्ट बाट सो सेवाको सुभारम्भ गरिएको हो । महानगर प्रमुख धनराज आचार्यले शुभारम्भ गर्नुभयो ।

महानगरले सार्वजनिक सूचना जारी गरी शौचालय उपयोग गर्न दिन इच्छुक व्यक्ति तथा संस्थालाई साउन मसान्तभित्रमा महानगरमा निवेदन दिन आह्वान गरेअनुसार सार्वजनिक उपयोगमा ल्याउन इच्छा देखाएका व्यक्ति तथा व्यावसायिक संस्थासँग सम्झौता गरिएको हो ।

विभिन्न व्यक्ति, कम्पनी, वित्तिय संस्थाबाट सो सङ्ख्यामा अनुमति प्राप्तपछि सञ्चालनमा ल्याइएको महानगर प्रमुख आचार्यले बताउनुभयो । प्रयोगकर्तालाई सार्वजनिक शौचालय पहिचान गर्न सजिलो होस भनेर सबैमा एकै प्रकारको सङ्केत चिह्न राखिएको छ।

महानगर कार्यपालिका बैठकले महानगरका ३३ वटै वडामा सुविधासम्पनन सार्वजनिक शौचालय बनाउने निर्णय गरिसकेकाले आगामी एक वर्षभित्रमा निर्माण गरिने र सो समयसम्मका लागि नीजि शौचालय प्रयोग गर्ने गरी सम्झौता भएको आचार्यले जानकारी दिनुभयो ।

उहाँले भन्नुभयो,“शहरभित्र सार्वजनिक शौचालय नहुँदा कति सास्ती बेर्होनु पर्दछ भनेर सबैले अनुभुति गरेकै विषय हो । सार्वजनिक नीति साझेदारी अनुसार मिलेर काम गर्दा नतिजा दिन सकिन्छ भन्ने भएको छ । शौचालय बाहिर देखिने गरी लोगो राखिएकाले कसले साझेदारी गरेको भन्ने स्पष्ट हुन्छ ।”

सिटी स्क्वायर प्रालिका सल्लाहकार उमेश पराजुलीले जनसेवाप्रति उत्प्रेरित भएर आफूहरुले सार्वजनिक प्रयोगमा शौचालय उपलव्ध गराएको बताउनुभयो । उहाँले स्थानीय सरकारले विगतका बेथितिहरु सुधार गर्दै जनतासँग नजिक भएर काम गर्नुपर्ने धारणा राख्नुभयो ।

महानगरले सार्वजनिक रुपमा निःशुल्क उपयोग गर्न दिए बापत त्यस्ता व्यक्ति वा संस्थालाई महानगरबाट उपलब्ध हुने सेवा सुविधामा प्राथमिकता दिने गरी नीतिगत व्यवस्था गरिने जनाएको छ ।

शौचालय प्रयोग गर्न दिन मञ्जुर व्यक्ति वा संस्थासँग आगामी एक वर्षका सम्झौता गरिएको शौचालयमा आवश्यक पर्ने सफाइ एवम स्यानिटरी सामग्री महानगरले आवश्यकता अनुसार उपलव्ध गराउने प्रमुख प्रशासकीय अधिकृत वीरेन्द्रदेव भारतीले बताउनुभयो ।उहाँका अनुसार प्रयोगमा ल्याइएका स्थानमा विशेष पहिचानयुक्त लोगोे वा सङ्केत राखिएकाले सर्वसाधारणलाई अलमल हुने छैन ।

महानगरले सम्झौता गरेकाहरुमा व्यक्तिगत घर, बैँङ्क तथा वित्तिय संस्था, व्यापारिक कम्प्लेक्स, पेट्रोल पम्प, होटल तथा रेष्टुरेण्ट आदि रहेका छन् ।