पोखरा । पोखरामा आयोजित प्रथम महानगर प्रमुख ‘मेयर सम्मेलन’ शनिबार सकिएको छ।
महानगरलाई जनउत्तरदायी बनाउन निर्वाह गर्नुपर्ने भूमिका तथा साझा सवाललाई सम्बोधन गरी कामलाई सहजीकरण गर्न सघाउने विश्वासले शुक्रबारदेखि शुरु भएको प्रथम महानगर प्रमुख मेयर सम्मेलन शनिबार सकिएको हो ।
सम्मेलनले आउँदो मेयर सम्मेलन भरतपुरमा गर्ने निर्णय गरेको छ ।
पोखराका मेयर धनराज आचार्यले भरतपुरका मेयर रेनु दाहाललाई ‘मेट्रो मिट नेपाल’ अङ्कित झण्डा हस्तान्तरण गर्दै दोश्रो मेयर सम्मेलन भरतपुरमा गर्न स्वीकृति प्रदान गरेका हुन् ।
मेयर सम्मेलन भरतपुर भ्रमण वर्ष २०८० मा हुने बताइएको छ ।
सम्मेलनमा आयोजक पोखरासहित काठमाडौँ, विराटनगर, चितवन, ललितपुर र वीरगञ्ज महानगरका प्रमुख, उपप्रमुख तथा प्रमुख प्रशासकीय अधिकृतहरु सहभागी थिए ।
सम्मेलनमा महानगर सञ्चालनका विद्यमान कानून र आवश्यक सुधारका विषयमा छलफलसहित अनुभव आदान प्रदान गरिएको थियो ।
यसैगरी उपप्रमुखले ऐनले निर्दिष्ट गरेका जिम्मेवारी सम्बन्धमा अनुभव तथा सिकाइ आदानप्रदानका साथै महानगरका प्रमुख प्रशासकीय अधिकृतले विद्यमान ऐन, कानून तथा तिनका कार्यान्वयनका चुनौतीबारे आआफ्नो अनुभव आदान प्रदान गरेका थिए ।
प्रतिक्रिया लेख्नुहोस्:-